Rung Semi final ka Nonglatem bad ka Lumkhangdong Kyndongtuber haka 3rd; Jop ka Giovento Mynso haka 2nd Division

Jowai, Nailur 21: Ka jingïalehkai phutbol bala pynïaid daka West Jaiñtia District Sports Association (WJDSA) kaba la long ha ka 20 tarik u Nailur, 2025 (sngi Saitjaiñ) haki ar tylli ki kyrdan kata ka ‘5th Adelbert Memorial Trophy Third Division Football 2025 bad ka ‘8th Debo Shullai Memorial Trophy Second Division Football 2025 bala pynlong ha madan Kiang Nangbah Stadium Dongmihsngi, Jowai.
Haba phai sha ka jingïakhun ba nyngkong jong kane ka sngi haka kyrdan Third Division la ïohi ïa ka Nonglatem kaba la pynliem noh da 2-1 kol ïaka Da-i-hi Mynsngat. Ka Nonglatem ka la pynkhihjar lyngba u Healthiest Lamare haka minit ba 29 bad u Pyndap Muktieh haka minit ba 35. Katba ïa ka shikol na ka bynta ka Da-i-hi Mynsngat la thep da u Pynskem Mukhim haka minit ba 38.
Haka jingïakhun kaba ar ka Lumkhangdong Kyndongtuber kala pynliem noh da 3-1 kol ïaka Youth Welfare Iooksi SC. ïa ki kol na ka Lumkhangdong Kyndongtuber la thep da u Pynshaiburom Phawa haka minit ba 5, u Hailan Shylla haka minit ba 64 bad u Medawan Phawa haka minit ba 74. Ïa ka shikol na ka Youth Welfare Iooksi SC la thep da u Wompher Tangliang haka minit ba 70.
Da kane ka jingjop kine ki ar kynhun ka Nonglatem bad ka Lumkhangdong Kyndongtuber kila pynthikna ïa ka jaka ha ka Semi Final jong kane ka lympung.
Ka jingïakhun kaba khatduh jong kane ka sngi ka la long ha ka 2nd Division, ha kaba ka Giovento Mynso kala pynliem da 2-1 kol ïaka Shangpung Khliehmuchut. ïa baroh ar tylli ki kol na ka bynta ka Giovento Mynso la thep marwei da u Lighting Syntem (22 & 80+3). Ïa ka shikol na ka Shangpung Khliehmuchut la thep da u Samedahun Papang haka minit ba 70.