Jowai, Risaw 22: Ka Nongkhroh Mawsiang SC ka la ïoh ban bteng ïa ka jingïaid lynti sha ka semi final ha ka lympung phutbol bala tip kum ka ‘Hajan Shylla Memorial Trophy 1st Division’ bala pynïaid daka Thadlaskeiñ Sports Association (TSA) West Jaiñtia Hills, hadien ba ka la jop ïa ka jingïakhun Quarter final kaba la long hynne ka sngi Balang, 22 tarik u Risaw, ha madan Wahiajer Multi-Sports Complex.
Lah ban ong ba ka jingïalehkai ka la long kaba noh shiliang, ha kaba ka Nongkhroh Mawsiang SC ka la pynjem khnap haduh 8-0 kol ïa ka Namdong-B ha kaba u Rio Myrboh, u la tyngshaiñ da kaba thep marwei haduh san kol (8, 21, 23, 65 & 73).
Ki lai tylli kiwei pat ki kol jong ka Nongkhroh Mawsiang kidei kiba la thep da u Pynsuk Diengdoh (61 & 15) bad u Snowell Kharsati (51).
La pyntip ka jingïakhun Quarter Final kaba ar kan long ha kane ka sngi Palei, 23 tarik u Risaw, bad kan sdang ha ka por 2 baje nohphai sngi hapdeng ka Jalapang SC pyrshah ïaka Ummulong SC.
