Jowai, Nailar 07: Ka kynhun ïalehkai jong ka Khliehïongriang mynta ka sngi kala ïoh ban rung sha ka jingïakhun phainal jong ka lympung ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) mynta ka sngi ha madan Kiang Nangbah Stadium Jowai.
Kane ka jingïoh rung Phainal ka Khliehïongriang kala wan hadien ba kala lah ban pynliem syndon da 1-0 kolk ïa ka Iawmulong Nartiang bad ïa katei ka shikol la thep da u rangïalehkai jong ka u Juhhi Langshiang haka minbit kaba 29.
Haba phai sha ka jingïakhun jong kine ki ar kynhun kala long kaba ïakhait bha naduh ka kylla step tad haduh jong ka kylla miet, na ka liang ka Iawmulong Nartiang hadien ba la shah thep ïa katei ka shikol kala pyrshang ban pynphai kylla hynrei haduh ba kut jong ka jingïakhun ka Khliehïongriang kala jop da shi kol.
