Shillong, Naiwieng 03: Ka Shillong Lajong ka kylla long ka kynhun kaba nyngkong eh ban ioh rung sha ka quarter final jong ka Meghalaya State League 2024 hadien ba ka la ioh ban pynliem noh ia ka Mawtari Myrdon haduh 4-0 kol ha ka jingialehkai kaba itynnad bha kaba long ha Wahiajeer ha kane ka sngi Saitjain na ka Group E.
Ia ki kol jong ka kynhun ha kane ka sngi la ioh ban thep da u Yohaan Benjamin ha ka minit kaba 17 bud pat sa ki ar kol na u Deibormame Tongper ha ka minit kaba 19 bad 66 bad ia kawei pat ka kol la ioh ban thep da u Rimankhraw Kharumnuid ha ka minit kaba 29 jong ka kyllas tep.
Da kane ka nam jop, ka la plie lad ruh ia ka Shillong Lajong kaba dei ka lahduh ha u snem 2019 ban jam shakhmat ha katei ka league da ka jingkyrmen kaba khraw hadien ba ka la ioh ba khur pura ka jingioh point da ki 9 point katba ka Mawtari pat ka neh da ki 6 point. Kane ka kynhun ruh ka don pat ka jingkyrmen ba kan ioh rung lang sha ka quarter kum kawei na ki kynhun ba wan ba ar kiba hakhmat eh. Tangba ia kane ruh kan hap ban ap haduh ban da dep lut ki jingiakhun ha kiwei kiwei ki group.
Ha kajuh ka por ka kynhun ialehkai jong ka Rymbai Shkenshynriah ka la ioh ban lamkhmat ha ka Group D ha Khliehriat da kaba jop haduh 5-0 kol ia ka Iatyllilang Lumskehkot Raliang.
Ha ka Group A baroh ki kynhun ki marjan ka jingioh kamai point kata da kaba tam beit tang mar shi point kawei ia kawei pat ka kynhun. Ka Pinggera Do·gisik’s ka la ioh ban pynliem noh da 2-0 kol ia ka Atong ha ka jingiakhun kaba long ha Tura bad kane ka la pynlong ia ka Pinggera Do·gisik bad Lumsohkhlur ban don mar 3 point, katba ka Chipakkore pat da ki 4 point
Ka jingiakhun ba kham itynnad kadei ruh ha ka Group F ha kaba ka Seng Samla Mawmluh ka la ioh ban pynliem ia ka Patharkhmah da 5-3 kol ha ka jingialehkai kaba long ha Shillong.
Ha ka Group C pat ka Ladthalboh ka la jam shakhmat da kaba jop biang da 2-0 kol ia ka Nangkiew Shaphrang Lumdiengngan ha ka jingiakhun kaba long ha Tyrsad.
Ha ka Group B pat ka Khliehmawlieh hadien ba ka la shah tam da 2-0 kol ka la iakhun tyngeh ha ka kylla miet bad ioh ban pynphai bad thep syndon ia u namtam bad khur syndon ia ka jingjop ha ka jingiakhun kaba itynnad bha kaba long ha Mawkyrwat.
