Khliehriat, Nailur, 07: U MDC jong ka Saipung-Nongkhlieh Constituency u Lalwilliama Thaite, uba la jop ïa ka elekshon dang shen na ka seng Congress bad u Bah Philip Tangliang uba long u MDC barim jong ka Sumer Constituency ha ka sngi Saitjaiñ ki la pynïasoh ïalade bad ka National People’s Party (NPP) ha ka jingïalang kaba la long ha Khliehriat.
Ïa kine ki ar ngut la pdiang sngewbha sha ka party da ki MLA ka NPP na East bad na West Jaiñtia Hills District ba kynthup ïa u MLA ka Jowai Constituency u Bah Wailadmiki Shylla, ka MLA jong ka Sutnga-Saipung Constituency ka Kong Santa Mary Shylla ryngkat ka jingsakhi lang ki MDC ba kynthup ïa u Bah Seiborlang Shadap, Bah Hambertus Nongtdu, MDC, u Dr. Sankey Shangpung, ka Kong Violet Lyngdoh, Bah Krison Langstang bad ki MDC barim.
U Bah Wailadmiki haba kren ha ka jingïalang u la ong ba kane ka jingpynïasoh jong u Bah Lalwilliama Thaite bad u Bah Philip Tangliang sha ka NPP ka pynphalang ïa ka jinglong jong ka NPP ïa ka jingïohi jngai jong ki nongïalam ka party, ka party ba lah ban shaniah bad kaba don ki nongïalam kiba ïohi jngai bad ka jinglah jong ki bad ka jingshimkhia ki nongïalam ka party kan nang ïai pynkhlaiñ shuh shuh ban ai ka jingshakri ïa ki paidbah bad ban wanrah ïa ka roi ka par ha ka thaiñ.
Ka Kong Santa Mary Shylla ka la ong ba kane ka dei ka por jong ka jingïatylli bad ban kyntiew ïa ki Constituency. “Ka jingai jingkyrshan lang jong u Bah Lalwilliama Thaite bad u Bah Philip Tangliang kan nang pynïoh bor shuh shuh ïa ka NPP ban treikam kham bha bad ban wanrah ïa ka jingïajan bad ki paidbah bad kan wanrah ruh ïa ka roi ka par ha ki shnong ki thaw,” la ong ka Kong Santa.
