Amlarem Risaw 07: U Ex MLA ka 7-Amlarem Constituency u ma R.L. Tariang lem bad ki nongkyrshah jong u kila rung sha ka National People Party (NPP), haka jingïalang kaba la pynlong mynta ka sngi Thohdieng ha Syiem Jingsuk Hall, Amlarem West Jaiñtia Hills District.
Ha kane ka sngi ka seng kala pynlong ka jingïalang ban pdiang burom bad pynskhem ïa kitei ki dkhot ba thymmai kiba wan ban pynïasoh sha ka seng lyngba ka NPP 7-Amlarem Block, da ka jingwan sakhi da ki spah ngut ki nongkyrshang ka thaiñ, ha ka juh ka por la aiti ruh ïa ki form jong ka seng da u MLA ma Wailadmiki Shylla uba dei ruh u District President NPP ka WJHD ha u ma R.L. Tariang.
Kiwei de kiba ïadon lang ki kynthup naduh u ma Stephamson Mukhim u kyrtong MLA na ka 7-Amlarem, ma R.L. Tariang, ex MLA, ma Holando Lamin (MDC) War Central, ma Saron Paswet (MDC Jowai South Constituency, ma Het Pohthmi MDC War West Constituency bad uba dei u Block President, ma Otomewot Lamin (Nominated MDC), nalor kiwei de.
Kiba bun na ki nongnkren ha kane ka sngi kila pynrem jur halor ka jingtreikam jong u MLA ma Lahkmen Rymbui ki bym shem lah ban pynhun ïa kiba bun ba lang, la kynthoh ruh halor ka jingkop u ma Rymbui ban wanrah ïa ki skim bapher bapher kiba long tang ki jingpynbeit ïa ki nongkyrshan.
Shuh shuh kila kynthoh ïa ka jingshah lehbeiñ jong ki nonghikai naduh ki Adhok, SSA bad ki nonghikai Casual hapoh ka jylla, da kaba ong kine ki mih tang da ka daw ka jingbymbiang ka rukom treikam u ma Rymbui kum ki nongbat ïa ka tnad Pule puthi bad kumjuh ïa ka kam khappud kaba la wan rah jingeh ïa ki nongrep na ka jingker sainar shiah.
Ha kane ka sngi ka seng kala ïakren ban pynbha pynmiat shuh shuh ïa ka rukom treikam hapoh ka 7-Amlarem Constituency na ka bynta ka Election 2023 bad ban pynbeit ïa ka jingïalang bah ka ban sa long shen na ka bynta ka jingpynbna tiket ïa u kyrtong ka 7-Amlarem da u myntri rangbah ka jylla ha ryngkat ka jingwan synran lang ki nongïalam ba hakhmat jong ka seng NPP.
Ha kane ka sngi la kyntu ïa ki Unit bapher bapher hapoh kane ka Constituency ba kin trei shitom ban peit ïa ki jingeh jong ki paidbah, kaba lah ban pynsuk shuh shuh ïa u Candidate ha ka rukom treikam.
La pynsngew ruh da ki nongkyrshan ka seng mynta ka sngi ba ki don shibun ki nongïalam ba rim jong kiwei de ki seng saiñ hima sima kiba la wan ban pynïasoh bad ban ai jingkyrshan ïa u kyrtong ka NPP ma Stephanson Mukhim ha kane ka Election 2023.
U ma R.L Tariang u ong kane ka dei ka sngi sah jingkynmaw kum ki nongkyrshan ba thymmai ka NPP napoh kane ka Constituency, ula pynsngew ba ïa ka tiket na ka 7 Amlarem la tikna ban poi beit sha u Staphanson Mukhim bad u kyrmen skhem ba un trei kham bha ïa ka Constituency ha kaba ïadei bad ka kam jngoh kai pyrthei kaba long ruh katkum ka jinglong jingman jong ka jong kane ka jaka kaba la khring ïa kiba bun na kylleng ki jaka ban wan shangkai pyngngad.
Kumba long mynta u ong ki don hadun san ngut ki MDC kiba kyrshan ïa u ma Staphanson Mukhim nalor bad u kum u EX MLA barim ka tnaiñ.
