Shillong, Risaw, 17: Ka jingïoh rung laitlan jong ki briew ha khlaw Lawmali ban leh ïa ki kam jakhlia ba isaitmet bad kaba pynshong syier ïa ki nongleit nongwan na ka surok kaba don markhap bad kane ka khlaw, ka la pynsngewkhia haduh katta katta ïa u MLA jong ka Shillong North Constituency u Bah Adelbert Nongrum.
Kum u nongmihkmat, ha ka sngi Palei u Bah Nongrum u la leit ban aiti da ka jingthoh ha ka Deputy Commissioner jong ka East Khasi Hills District ka Kong RM Kurbah.
Ha ka jingïakren bad ki lad pathai khubor hadien ka jingïakynduh ïa ka Deputy Commissioner u Bah Nongrum u la ong ka Deputy Commissioner ka la lum jingïalang ha ka 19 tarik, Naitung, 2023 ïa ki tnat treikam bapher bapher bad ïa ki Dorbar Shnong ha kaba la shim rai ban kyntu ïa ka Deputy Commissioner ban phah da ka jingthoh sha ka tnat Forest khnang ba ki nongpeit ïa kane ka khlaw kin plie da ka por ïa ka rung ka mih.
“Hynrei mynta la shi snem kynthih ngim shym la ïoh ïa ka jubab na ka tnat Forest. Dei halor kane ka nongrim ba ha 30 tarik, Jymmang 2024 nga la lum da ka jingïalang bad nongïalam jong ki 14 tylli ki kynhun Balang kiba don ïa ki lum jingtep ha khlaw Lawmali ha kaba ki la ai jingmut ba ngan buddien ïa ka rai kaba la shim ha ka 19 tarik, Naitung, 2023,” u la ong.
“Ka por ka dawa, kumno ban tehlakam bad ban pynduhjait ïa u drok namar ka jingïohrung laitlan ha kane ka ri jong ngi. La kumba 6-7 snem ka jingïoh rung laitluid jong ki briew da ki kali saw shaka bad ki ar shaka (ban ïashongkai sadhai) haduh 1 baje-2 baje mynstep, ki paidbah bad ki nongïalam shnong ki pyntip sha nga kum u MLA ba ki khun samla kin ym ngop ha ki jingsniew,” u la ong.
U la ïathuh ba ha ka shithi pynkynmaw ba la aiti ha ka Deputy Commissioner ka la don ka jingjia ha kaba ki runar ki la pajut ïa ki sohkhor jong ki kynthei kiba ïaid lynti. “Dang ha kine ki khyndiat sngi, ha ka 8 tarik mynta u bnai i don iwei ïa khynnah kynthei ba la shah ksih ha ka por 6:30 baje janmiet. Donbok ba ka wan ka kali, i la lait (na ka kti jong ki runar.” la ïathuh u Bah Nongrum.
U la pynpaw ruh ban tehlakam ïa ki briew kiba rung laitlan ha khlaw Lawmali ka dei beit sa tang na ka tnat Forest ban shna noh da ka khyrdop bad ban buh da u nongap khyrdop.
“Ngim pynrem ïa kiba la ïaid bakla ha ka jingim jong ki, hynrei ka dei pat ka kamram jong ngi ban tehkalam ïa ki jingsniew bapher bapher bad khamtam ïa kito kiba la ïaid kynriang ha ka jingim,” la pynpaw u Bah Nongrum.
