Rung laitlan ki briew na West Bengal bad Assam sha Meghalaya ba pyntreikam ïa ka SIR dawa pyrkhing ka CoMSO

Shillong, Naiwieng 24: Ka Confederation of Meghalaya Social Organisation (CoMSO) ha ka sngi Nyngkong ka la dawa ïa ka Sorkar Jylla ba kan shim mardor katkum ka aiñ ïa ki sienjam ha ka ban tehlakam ïa ka jingwan rung ki briew na West Bengal bad Assam, kiba don hapdeng ka huri hura na ka jingleh ïa ka Special Intensive Revision (SIR) ha kine ki Jylla.
Ha ka kyrwoh khubor lyngba u Chairman ka CoMSO bad President ka HYC Bah Roykupar Synrem la ong, “Namar kata, ngi dawa ban shim mardor ïa ki sienjam kat kum ka aiñ, da kaba pyntreikam ïa ki kyndon aiñ ban pyrrkhing bad haba donkam, ban khang ïa ka jingwan rung ki briew sha Meghalaya tad hadien ka jingpyndep ïa ki jingpynshisha bad tip ba kim dei kiba buh jingma”.
Ka CoMSO ka la dawa ruh ban pynrung kyrteng khlem pep, pynshisha ïa ka kyrteng bad jaka sah, bad baroh ki kot ki sla jong ki briew ba wan rung sha Jylla na ki thaiñ kiba shah ktah ha ka SIR.
Nalor kane, ka la dawa ruh ba dei ban buh ïa ki Pulit bad ki bor District ha baroh ki jaka rung, aibor ba kin pyntreikam ïa ki aiñ kiba lah ban pyntreikam, ban pynmih mardor ïa ki jingpynbna lane hukum na ka Sorkar, pynshai bha ïa ki sienjam ba lah ban shim da ki bor Sorkar, bad don ka jingïatreilang bad ki bor Sorkar ka Assam bad West Bengal khnang ban lah pynshisha bad khanglad ïa ki briew ki bym don kot don sla na kine ki jylla sha Meghalaya bad kiwei kiwei ki jingdonkam.
Halor kane na ka liang jong u Bah Roykupar ula maham ruh ba ka jingïoh rung ki briew na kine ki Jylla kan buh ha ka jingma ïa ka jingshngaiñ, ka jingpynthut ïa ka suk ka saiñ bad ka hok jong ki nongshong shnong ka Meghalaya.
Shuh shuh U Bah Roykupar ula ban jur ba ka Sorkar Jylla ka dei kaba la ïoh bor da ka aiñ bad ka don ka kamram katkum ki kyndon aiñ bapher bapher ban pyrrkhing ïa ka jingrung ki briew, ban talasi ïa ki kot ki sla ban pynshisha, bad pyntreikam ïa ki lad ki lynti kiba donkam ban khanglad ïa ki jingpynthut ïa ka shongsuk shongsaiñ.
Ha kaba ïadei bad kane u la ong, “Hynrei ula ong pat haba khmih ïa kine ki jinglong jingman, ka jingbym leh eiei lane ka jingpynslem ban leh eiei ka lah ban lam sha ka jingbym lah treikam ki bor synshar ka ban ktah jur ïa ka jingshngaiñ bad ka synshar aiñ”.
“Kane ka dei ka kam ba ïadei bad ka jingshngaiñ u paidbah bad ka jingkitkhlieh kat kum ki lynti ka aiñ. Ki paidbah ka Meghalaya ki khmih lynti ban ïohi ïa ki sienjam kiba sted, kiba skhem bad kiba shongaiñ” ula ong.