Nongpoh, Rymphang 17: Ka long ka jingsarong bad ka burom kaba khraw ïaka jylla hadien ba ka University of Science and Technology Meghalaya (USTM) kala thaw histori ban ïoh rung ha ka kyrdan ba 18 ha ka Fortune 100 National Institutional Index 2026, bad ioh ka jingïaroh na ka pyrthei baroh kawei halor ka jingnoh synñiang jong ka sha ka pule puthi kaba ïadei bad ki United Nations Sustainable Development Goals (SDGs) bad ka UN 2030 Agenda.
Ïa kane ka National Institutional Index la pynbna paidbah ha ka Global Conference on Education for Sustainable Future (GCE2026) kaba la long ha United Nations Conference Centre, Bangkok, Thailand ha ka 11 tarik Rymphang 2026.
Ha kane ka sngi, u Vice Chancellor jong ka USTM, Prof. G. D. Sharma, u la ïoh pdiang ïa ka syrnod Certificate of Recognition na ka Fortune Institution Index, kaba pynthikna ïa ka jingdon bynta jong ka University hapdeng ki 100 tylli ki skulbah bala jied kyrpang.
La sam ïa kane ka burom ha ka jingdonlang ki heh ophisar ba kynsai na kylleng ka pyrthei, kynthup ki myntri bad ki nongmihkhmat kiba ïadei bad ka pule puthi bad ka SDG Council.
Ka jingpynbna ïa ka Fortune 100 National Institutional Index ka la long hadien ka jingbishar kaba bñiah ïaki jaka pule katkum ki kyndon bapher bapher kum ka jingkiew ka pule puthi, ki jingwad bñiah, ka jingïalam bad ka jingiohi jngai bad ban bud ïaka Sustainable Development Goals (SDGs) jong ka United Nation bad kane ka jingïoh nam jong ka USTM ka la long ka jingkyrkhu kaba khraw ym tang ïa ka skulbah hynrei ïa ka jylla Meghalaya hi baroh kawei.
