Shillong, K’Lyngkot 18 : Ka Kot ‘The Pulse’ ba la thoh da i Kong Eldora Betsy Lyngdoh i nongshong shnong na Mawkhar, Shillong ka la ioh ban rung haduh ka World Book Fair 2026 kaba dang shu kut shen mynta ka sngi.
Ïa kane ka kot kaba don haduh 101 tylli ki poitri, i Kong Eldora i la ioh ban pyllait paidbah ha ka Lympungbah kaba long ha Delhi mynta ka taiew ha ryngkat ka jingdonlang u Kurim jong i, Bah Ransom Sutnga.
Lah ban kdew hangne ba ka Delhi World Book Fair kadei ka lympung kaba heh tam ha ka dewbah Asia ha kaba ki nongthoh bad ki riewshemphang kiba sngewtynnad ban pule kot bad poitri da ki hajar ki wan na kylleng ban shim bynta.
Dang shen ine i longkmie i la khur ïa ka kyrdan kaba ar ha ka ïakob thoh poitri kaba la wan ban shim bynta da ki riewshemphang na kylleng ki ri ka pyrthei ïa kaba la tip kum ka International Literary Prize City of Arona 2025 ha ka thup Unpublished Poetry Section.
