Dhakuakhana/Silapathar, Rymphang 03 : Ka kynhun ïalehkai jong ka Kerala, Punjab, Services, bad Railways ki la khur ïa ka jingjop ha ka jingïakhun ïa ka quarter final jong ka 79th National Football Championship for Santosh Trophy 2025-26 Final Round kaba long hynne ka sngi Ba-ar ha Dhakuakhana bad Silapathar.
Kine ki saw tylli ki kynhun kin rung pat mynta sha ka semi final jong kane ka lympung ha kaba ïa ka jingïakhun la buh ban kan sdang biang naduh ka 05tarik mynta u bnai hi.
Haba phai sha ka jingïakhun kaba nyngkong, ka kynhun ïalehkai jong ka Services kan hap ban ïakhun pyrshah ïa ka Railways ha Silapathar Football Stadium, katba ka Kerala pat kan ïakhun pyrshah ïa ka Punjab ha ka semi final kaba ar kaban long ha Dhakuakhana Football Stadium. Kine baroh ar tylli ki jingïakhun kin long ha ka por 13:30 IST, bad yn pyni live ruh ha FIFA+.
Ha ka jingïakhun ïa ka quarter final kaba nyngkong, ka Kerala ka la ïoh ban pynliem haduh 3-0 kol ïa ka Assam. Ïa kine ki kol jong ka Kerala la ïoh ban thep da u Manoj M tang ha ka minit kaba 17 bad ïa ka kol kaba ar pat la ïoh ban thep da u Muhammed Ajsal ha ka minit kaba 44 jong ka kylla step. Ïa ka kol kaba lai pat la ïoh ban thep da u Aboobacker Dilshad ha ka minit kaba 90+2.
Na ka liang ka Assam tad haduh ban da kut ka por ïalehkai ruh ka khlem lah satia ban pynphai wat tang shi kol ruh.
Ha ka jingïakhun ïa ka quarter final kaba ar pat, ka Services pat ka la pynliem da 3-2 kol ïa ka West Bengal kaba dei ka lahduh ha ka samoi ba la dep ha ka jingïakhun kaba la poi shaduh ka penalty hadien ba ka jingïalehkai ha pdeng madan ka la kut noh da mar 0-0 kol ha Dhakuakhana Football Stadium.
Dei lyngba ka jinglah jong u rangap kol ka Services ban ïalehkai bha kaba la plie lad ïa ka kynhun ban rung sha ka semi final.
Katba ha ka quarter final kaba lai kaba long ha Silapathar Stadium pat ka Punjab ka la pynliem haduh 4-1 kol ïa ka Tamil Nadu kata ruh lyngba ka jingïashut Penalty hadien ba ka jingïakhun ha pdeng madan ka la kut noh da ka jingïakhaid mar 1-1 kol.
Ha ka jingïakhun dei ka Punjab kaba ïoh ban pynkhih jar nyngkong tang ha ka minit kaba 37 jong ka kylla step lyngba u Jatinder Singh Rana hynrei dei ha ka minit kaba 84 jong ka kylla miet ba ka Tamil Nadu ka la ïoh ban pynïakhaid ïa ka jingïakhun lyngba ka penalty.
Ha kane ka kynti u M Umashankar khlem bakla u la ïoh ban pynkhih jar bad ïoh ban ïalam ïa ka kynhun ban ïakhun haduh ka extra time bad poi syndon shaduh ka jingïashut penalty tangba ki la pat pat ka jingshah rem noh da 4-1 kol.
Katba ha ka jingïakhun ïa ka quarter final kaba saw, ka Railways ka la ïoh ban pynliem noh da 2-0 kol ïa ka Rajasthan ha ka jingïalehkai kaba long ha Dhakuakhana Football Stadium.
Ïa kine ki kol la ïoh ban thep da u Saurabh Bhanwala ha ka minit kaba 78 katba u Johnson Joseph Mathews pat u la ïoh ban thep ïa ka kol kaba ar ha ka minit kaba 83 jong ka kylla miet.
