Rung ha Secretariat kum ki ophisar IAS, buh thong bad trei shitom lypa naduh mynta

Shillong, Naiwieng 09 : U Working President ka National People’s Party (NPP) Bah Hamlet Dohling u la kyntu jur ïa ki khun samla ba ki dei ban buh ka thong ban ïoh rung ha Secretariat kum ki ophisar IAS ban peit bad pynïaid ïa ka jylla baroh kawei ryngkat ryngkat bad u Myntri Rangbah kumjuh bad ki Myntri Sorkar.
Ïa kane u la kren kum u Kongsan ha ka jingïalang pynkup burom jong ka NPP Mylliem kaba la tip kum ka Tirot Sing Syiem Academic Awards ïa ki 93 ngut ki samla pule kiba pass bha mynta u snem kynthup ïa ki laingut kiba wan ha ka Top 10 ha ka HSSLC bad sawngut pat ha ka PhD ha ka jingïalang kaba long ha Cultural Centre Madan Ïing Syiem, Mylliem.
Kiba bun na ki samla kiba shah pynkup burom ki dei kiba pass bha ha ka class 10 bad kumjuh ruh ha ka class 12.
“Ngi ju ïai kren ïa kane ka phang ba la duna shisha ki ophisar IAS ki jongngi. Dei maphi ki khun samla ban pyndap ïa ka jaka ha Secretariat, lada maphi phim leit ban pule ïa ki exam civil services bapher bapher kumno kein phin leit ban shong ha Secretariat ban thaw ain lang bad u Myntri Rangbah ka Jylla kumjuh bad ki Myntri Sorkar ka jylla,” la bynrap shuh u Bah Hamlet Dohling uba bat ruh kum u Nongai buit jong u Myntri Rangbah ka Jylla.
Shuh shuh u ong ruh ba lada ki khun samla kim trei shitom da lei lei kin ym lah ban poi shaduh katei ka kyrdan. U ong ruh ba lada ki khun samla na ka jylla kim lah ym banse ban hap pyndap da kiwei pat ki ophisar kiba dei na kiwei pat ki jylla.
“Khun samla trei shitom, ïakhun ïa ki civil services exam namar ka jylla ka donkam ba phin don hangtei ha Secretariat. Ngim donkam ban kdew kti ïano ïano ruh hynrei ngin peit ïa ka jingdonkam jong ka jylla jongngi namar ka jylla ka donkam ïa ki IAS kiba stad bad kiba shemphang. Kaba khatduh eh ba ngi ïoh kadei haduh u snem 2012 bad naduh utei u snem ym don shuh kiba pass,” u la bynrap biang.
Shuh shuh u ong ba ki samla ka jylla ki lah beit ban pass namar lada ki samla na kiwei pat ki jylla ki lah kam don jingeh ïa ki khun samla na Meghalaya ba kin lah lada ki trei shitom bad minot.
Ha kane ka jingïalang, u Bah Hamlet u la pynbna ruh ba naduh u snem ban wan kin pynkup burom da ka laptop sha kito ki khun samla kiba wan ha ka Top 10 ha ka class 10 bad kumjuh ha ka class 12.
Na ka liang u Symbud Kongsan Bah Gavin Mylliem pat u la ai ka jingïaroh ïa ka NPP Mylliem kaba da ka jingkyrshan u MLA barim Bah Hamlet Dohling ka la lah ban pynlong ïa ka jingpynkup burom kaba shongkun ïa ki khun samla kum ka jingithuh ïa ka jingleh bha jong ki ha ki jingpule.
Ha kajuh ka por u la kyntu ruh ïa ki khun samla ba kin phaikhmat sha kiba bun ki polisi treikam jong ka sorkar ban kyrshan ha ka sengkam lajong ym ban shu phaikhmat eh tang sha ka kam sorkar.
Nalorkane, ka la don ruh ka jingpynkup burom ba kyrpang ïa u heprit Jude Maynard Khyriem uba tang ha ka rta ba 2snem 10 bnai u la lah ban tip lut ïa ka solar system.
Ha kane ka sngi la donlang ruh naduh u Adviser ka tnad Education ka sorkar jylla Bah HM Shangpliang, ki nongïalam ka party kynthup naduh Bah Emlang Lytan, Bah Manroi Kharpuri, Bah Khrawbok Sohkhlet, Bah Sharai Warjri, Bah Donkupar Sumer, Bah Ricky Pathaw President ka NPP Mylliem kumjuh ruh u Rangbah Shnong ka Madan Ïing Syiem nalor kiwei kiwei.