Rung final ka Umpohliew Jingtip HSS bad H. Elias ha ka U-14 Subroto Mukherjee Cup u DSO EKH
Shillong, Naitung 01 : Ka Umpohliew Jingtip Higeer Seconadary School bad ka H. Elias Memorial Higher Secondary School ki la rung sha ka final na ka kyrdan U-14 (Boys) ha ka lympung ïalehkai football u DSO ka East Khasi Hills District kaba la tip kum ka District Level Inter School Subroto Mukherjee Cup 2022.
Ka Umphliew Jingtip HSS ka la rung sha ka final da kaba pynliem da 3-0 ïa ka Ïewrynghep Secondary School ha ka jingïakhun semifinal ha ka sngi Thohdieng ha madan Heh Mawlai Phudmuri katba ka H. Elias HSS ka la pynliem da 3-0 ïa ka St. Gabriel Higher Secondary School ha kajuh ka madan ïalehkai.
Ha kane kajuh ka sngi la pynïalehkai quarterfinal jong ka kyrdan U-17 ki shynrang ha madan Third ground, Polo ha kaba ki skul kiba la ïakhun ki kynthup ïa ka Tlongumïam SS, O.M Roy Memorial HSS, Umphyrnai Presbyterian SS, H. Elias Memorial HSS, St. Anthony’s HSS, Sacred Heart Boy’s HSS, Shillong College Higher Secondary Education bad ka Umpohliew Jingtip HSS.
Ki skul kiba la jop bad rung sha ka semifinal ki kynthup ïa ka O.M Roy Memorial HSS kaba la jop lyngba ka tie breaker da 5-4 ïa ka Tlongumïam SS, ka Umphyrnai Presbyterian SS kaba la pynliem da 5-4 ïa ka H. Elias Memorial HSS, ka St. Anthony’s HSS ka pynliem da 2-1 ïa ka Sacred Heart Boy’s HSS bad ka Shillong College Higher Secondary Education kaba la pynliem da 6-0 pyrshah ïa ka Umpohliew Jingtip HSS.
Ka jingïalehkai semifinal jong ka U-17 (Boys) kan long mynta ka sngi Saitjaiñ ha kaba ka O.M Roy Memorial HSS kan ïakhun pyrshah ïa ka St. Anthony’s HSS ha ka por 8:30 baje mynstep ha madan Third Ground bad ka semifinal kaba ar kan long hapdeng ka Umphyrnai Presbyterian SS pyrshah ïa ka Shillong College Higher Secondary Education ha ka por 10:00 mynstep.
Ha kane ka sngi yn pynïalehkai semifinal ruh jong ki U-17 ki kynthei ha kaba ka 1st MLP B.N Secondary School kai aireng pyrshah ïa ka Ïewrynghep Secondary School ha ka por 11 baje mynstep bad ka Tbeh Jingshai Seconadary Scchool pyrshah ïa ka Umpohliew Jingtip HSS ha ka por 12:15 nohphai sngi. Ïa ka jingïalehkai yn pynlong ha Madan Heh, Malai.