Jowai, Jymmang 15: Ka kynhun ïalehkai kriket jong ka Mowkaiaw CYC kala ïoh ban jam sha ka Final jong ka District Cricket League 2025 bala pynïaid daka West Jaiñtia Hills District Cricket Association (WJHDCA) hadien ba ka la lah ban pynliem noh da 14 ron ïaka West Jaiñtia Police CC ha ka semi final ha Mini Stadium, Khliehtyrshi.
Haba phai sha kane ka jingïakhun Semi Final kaba la long ha ka sngi Palei (15 tarik u Jymmang), ïa ka jingkynting toss la jop da ka Mowkaiaw CYC kaba la kam trai ban tied nyngkong.
Ka Mowkaiaw CYC haba leit tied nyngkong kala kamai 101 ron na ki 20 ober bad liem 8 wiket. U Todan Rymbai ula noh synñiang 22 ron na ki 15 bol ryngkat kawei ka Six bad lai tylli ki Four, katba u Kitboklang Lyngdoh ula kamai 21 ron na ki 25 bol ryngkat lai tylli ki Four, nangta u Bundaki Lynthong pat ula ïarap 20 ron na ki 15 bol ryngkat kawei ka Six bad kawei ka Four.
Haba phai pat sha ki nongkawang ball jong ka West Jaiñtia Police CC, u Dabiang Marwein bad u Loverist Langbang, ki la ïoh ban khur mar 2 wiket na ki 4 ober ba ki la kawang.
Haba beh ïa ka thong, ka West Jaiñtia Police CC kam shym la lah ban poi sha ka thong ba ka donkam namar ba ka la kamai tang 87 ron na ki 20 ober bad duh noh 9 wiket. Watla na ka liang jong u Bishal M Sangma ula kamai 17 (10), u Sauni Nongtdu 12 (12) bad u Devention Lyngdoh 12 (32) kiba long tang maki lai ngut napdeng ki nongtied jong ka West Jaiñtia Police CC kiba lah ban kynjoh sha ka phew ron.
U Sanvert B Kurkalang bad u Kitboklang Lyngdoh, nongkawang bol jong ka Mowkaiaw CYC ki la ïoh khur mar 3 wiket na ki 4 overs.
U Kitboklang Lyngdoh u ba ïalehkai bha ha ka tied (batting) bad ka jingkawang bol (bowling) u la ïoh ban khur ïa ka namtam kata ka khusnam Man of the Match.
Ka Semi Final ba ar kan long ha ka sngi Saitjaiñ (17tarik Jymmang,2025), hapdeng ka Ummulong SC pyrshah ïa ka Mupliang SC naduh ka por 8 baej shiteng mynstep.
