Rung final ka Goodwill Mupliang SC ha ka WJHDCA Cricket League; jop da 3 wiket ïa ka The Legend

Jowai, Ïaïong 02: Ka Goodwill Mupliang SC kala jop da 3 wicket ïa ka The Legend (Lissi Pearl) haka Semi Final ba nyngkong jong ka District Cricket League-2026 bala pynlong ha ka sngi Palei (02-04-2026) da ka West Jaiñtia Hills District Cricket Association, Jowai.
Ka Goodwill Mupliang SC ka la jop ïa ka jingkynting pisa bad ka la jied ban kawang bol nyngkong, bad ka la lah ban pynkhyllem noh ïa baroh ki nongtied (10 wiket) jong ka Legend (Lissi Pearl) tang na ka bynta 73 ron na ki 25.3 ober. Napdeng ki nongtied kiba ïoh ban kamai run khambun ki long u Conard Sana (28 ron naki 34 bol) bad u Rainbow Phawa (16 ron naki 32 bol). Ha kawei pat ka liang, u Greatestful Lyngkhoi, u Defender Dhar bad u Levestar Phawa, nongkawang bol jong ka Goodwill Mupliang SC ki la ïoh ban khur mar 3 wiket.
Hadien nangta, ka Goodwill Mupliang SC ka la pynskhem ïa ka jingjop da kaba kamai 78 ron bad hap 7 wiket haki 14.5 ober. La lamkhmat ïa ka kynhun ha ka tied da u Richest Star Dhar (24 ron naki 24 bol) bad u Oniwanker Sna (23 ron naki 20 bol). U Callten Sari bad u Dachange Mi Phawa, nongkawang bol ka The Legend (Lissi Pearl) ki la ïoh ban khur mar 2 wiket. Ha kaba kut ïa ka nam Man of the Match la khur da u Greatestful Lyngkhoi.
Da kane ka jingjop ka Goodwill Mupliang SC ka la pynthikna ïalade ha ka phainal, ha kaba kan ïakhun pyrshah ïa ka nongjop ha ka semi final kaba ar (ka Lion Y&SA lane ka West Jaiñtia Police CC) ki ban aireng mynta ka sngi.
Ka jingïalehkai Semi Final ba ar kan long ha kane ka sngi Saitjaiñ (04 -04-2026) hapdeng ka Lion Y&SA pyrshah ïa ka West Jaiñtia Police CC ha Khliehtyrchi Mini Stadium, haka por 9 baje mynstep.