Shillong, Ïaïong 26: Ka All Jaintia Cricket Association (AJCA) kala rung sha ka final na ka Zone 1 jong ka lympung ïalehkai Inter District U-19 Boys Cricket Tournament hadien ba kala pynliem da khyndai wicket pyrshah ïa ka East Jaintia Hills ha ka jingïalehkai kaba long ha ka sngi Ba-ar ha Jowai
Ka AJCA kala khur phra point na ki arsien ïakhun ha ka Group B kaba don lai tylli ki team. Ïa ka jingïalehkai final yn pynlong ha ka 30 tarik Ïaïong.
Haba phai sha ka jingïalehkai, ka EJH kaba la jop ïa ka jingkynting pisa kala kam ban tied nyngkong hynrei na ka jinglah ban kawang bol bha ki rangïalehkai ka AJCA ki rangtied ka EJH kim lah ban kamai ron bun. U Saibormiki Passah u khur 3 wicket ai kamai 17 ron, u Puraki Shadap Passah u khur 3 wicket ai kamai 24 ron bad u Chwamiki Ryngkhlem u ïoh 2 wicket ai kamai 7 ron ha ka jingkawang bol ba mar hynñiew over. Kumta ka EJH kala shah pynkhyllem lut baroh ki wicket da kaba kamai tang 84 ron ha ki 22.2 over, bad dei tang u Nishikania Sinha u kamai bun ron napdeng ki paralok kata da 34 ron.
Haba wan beh ïa katei ka thong, ka AJCA da kaba suk kala kynjoh sha katei ka thong bad kala duh noh tang shi wicket bala ïoh da u Rohit Sharma (1/19). U Jeremaia Mukhim u kamai 44 ron bad u Ryngkhlem 20 ron bad neh haduh bakut ka jingïalehkai (not out). Na ka jinglah ban kawang, ban tied bad ïoh pynhap wicket lyngba ka run out, u Ryngkhlem u la khur ïa ka khusnam Player-of-the-match.
Mynta ka sngi Ba-ar ha ka Group A jong ka Zone 1, ka Shillong CA (A) kan ïakhun pyrshah ïa ka SCA (B), kaba lamkhmat mynta ha ka jingïoh point da phra point katba ka SCA (A) ka ïoh 4 point. Ha ka Zone 2, ka Tura District CA kan ïakhun pyrshah ïa ka East Garo Hills ha ka jingïakhun kaban long ha Tura.
