Rung 50 tylli ki lieng na Bangladesh ban kit shyiap beaiñ, hap siat pyntieng ki BSF

Shillong, Naitung 23: U Company Commander, A-Coy, 50th Bn., BSF, BOP Patharghata (EKH) u la phah ka jingujor ba ha ka 21 tarik mynta u bnai ha ka por 6 baje janmiet, kumba 50 tylli ki lieng na ri Bangladesh ki la rung beaiñ sha u pud u sam ka ri India bad ki la donkti ban tuh bad ban kit ïa u shyiap.
Kham hadien pat ki shipai BSF ki la ïoh ban kem noh ïa 2 ngut kiba wanrung beaiñ kiba kynthup ïa u Alim Uddin, 28 snem bad Siraj Mia 64 snem ka rta. Hadien kane ka sngi kaba bud la lap ruh ba ki la don haduh 50 ngut ki nong Bangladeshi kiba la wanrung shapoh u pud u sam ka India bad ki la kawang ruh da ki maw ïa ki shipai BSF, bad kum ka dak ban pynphai khylla ki shipai BSF ki la hap ban siat haduh 4 sien sha suin ban maham bad ban pynpra ïa u paidbhur.