Shillong, Risaw 16: Ka khubor ba la ïoh na ki pulit la ïathuh ba ki runar bym lah ithuh ki la phrong hapoh kawei ka ïing sah jong ka Sanjana Devi ha Pynthorbah, Shillong bad rongei ïa ka pisa kumba T.3 lak.
Ka khubor na ki pulit la ïathuh ba kane ka la jia ha ka 9 tarik Risaw ha ka por janmiet.
Shuh shuh na ka liang ki pulit ki la ïathuh ba kawei pat ka jingjia, u Bah Melaai Syiemlieh ula ujor ha ki pulit ba ki runar ha ka 9 tarik Risaw ki la tuh ïa ar tylli ki Remote Radio Unit (RRU) kiba shongdor kumba T. 4 lak na kawei ka jaka shna tower ha ka shnong Mawten, South West KHasi Hills.
Ha kawei pat ka liang ki pulit ki la ïathuh ba uwei u briew u ba la ithuh kyrteng u Elmis Marak 20 snem, u la shah thombor bad shah shoh ha u paralok jong u ha Ïewduh, Shillong haduh ba u la mynsaw jur bad la pynkit ïa u sha Civil Hospital, Shillong ban ïoh ki jingsumar na kane ka jingmynsaw.Ki pulit ki la ïathuh ba kane ka la jia ha 13 tarik Risaw ha ka por kumba 7.30 baje mynstep.
Halor kane ka jingjia ki pulit ki dang pynlong ïa ka jingtohkit halor kine ka jingjia ban lap dien ïa ki briew ba donkti khnang ban ïoh pynngat hapoh ki kyndon jong ka aiñ.
Ha kawei pat ka khubor ki pulit ki la ïathuh ba kawei ka longkmie kaba dei ka trai company ha East Jaiñtia Hills ka la ujor pyrshah ïa uwei u Subrat Kumar Barik, MD jong ka M/s Girod Management & Advisory bad ki paralok jong u, halor ka jingkynnoh ba ki la thok ïa u lok jong ka bad ïa u paralok ba ju khaïi haduh T.2 klur katkum ka jingïateh kular ban bei tyngka ha ka 30 tarik u Nailur 2024 bad 1 tarik u Risaw 2024.
Halor kane jingjia ka la ujor sha ki pulit bad ka jingtohkit ka dang shakhmat ban ïoh kem ïa kitei ki briew kiba la shah kynnoh.
