Shillong, Jylliew 27: ka khubor ba la ïoh na ki pulit la ïathuh ba ka Hamlen Sukhlaiñ u la phah ka jingujor ba ha ka 22 tarik mynta u bnai ha ka por kumba 3.30 pm, u la lap ba ki runar bym lah ban ithuh ki la prong hapoh ka ïing jong ka kaba ha shnong Sutnga Mission (EJH) bad ki la tuh ka pisa kumba T. 50,000/- bad ka ksiar kaba shongdor kumba T. 4.5 lak ba la antad.
Ha kawei pat ka jingjia ki pulit ki la ïathuh ba ha ka step jong ka 24 tarik mynta u bnai, u Rangbah shnong ka shnong Thadmukoh (WJH), lyngba ka ktien u la pyntip sha ki pulit ba uwei u briew uba kyrteng u Sam Lyngdoh la shem ba u la thiah ïap hajan ka ïing jong u kaba ha shnong Thadmukoh.
Shuh shuh ka khubor ba la ïoh na ki pulit la ïathuh ba ha ka 24 tarik mynta u bnai ha ka por kumba 7.45 pm, ki pulit ki la ïoh bat ïa uwei u nongkhaïi drok uba kyrteng u Anil Biswa (24 yrs) ha Nongsohphoh (Naspatighari), Shillong, bad ki la lap ruh na u ïa ka synduk sabon kaba don u drok kumba 11.16 gram, halor kane ki pulit ki la kem noh ïa utei u briew.
Na ka liang ki pulit ki la ïathuh ruh ba ha ka 25 tarik mynta u bnai arngut ki briew kiba na nongbah Shillong ki la ujor lang ba uwei u Nure Samar Akhtar Menon (36 yrs), u la thok ka pisa kumba T. 5 lak bad T. 7 lak, da kaba pynngop ïa ki ba kin thep ka pisa hapoh ka account jong u lyngba ka IIFL Security.
Ha kawei pat ka jingjia ki pulit ki la ïathuh ba u Bah Eron Marweiñ bad u Bah Wanlamphrang Kharmalki jong ka Butcher Association of Meghalaya (BAM) ki la phah ka jingujor ba ha ka 24 tarik mynta u bnai ha ka por kumba 11 baje mynmied, ki dkhot jong ka BAM ki la bat ïa ki artlli ki trok (1) AS-01LC-3924 ba la ñiah da u Banlam Lynti Kharwar bad ka trok kaba don u nombar NL-01L-8057 ba la ñiah da u Marius Thanus ha Sohryngkham (EKH), ha kaba la kynnoh ba kine ki trok ki la kit ïa kumba 66 tylli ki muid na Byrnihat (RB) sha Laitlyngkot (EKH), khlem da don ki kot ki sla kiba biang, halor kane na ka liang ka seng ka la aiti noh ïa u nongñiah sha ki Pulit, katba ïa kitei ki jingri la aiti noh sha ka tnat AH Veterinary.
Shuh shuh na ka liang jong ki pulit ki la ïathuh ba ha ka 24 tarik mynta u bnai ha ka por 11.10 baje mynmied, ki pulit ki la ïoh ka jingtip halor ka jingdon jong ki runar ha Jowai Bypass NH-6. Ha ka jingtohkit, la lap ba kitei ki runar ki la pyrshang ban tuh ïa ki taïar na kawei ka trok kaba ïeng kaba don u nombar ML-05S-4439 kaba la sniew ha katei ka jaka. Kham hadien ki pulit ki la ïoh bat ïa 3 haduh 4 ngut kitei ki runar katba ki dang pyrshang ban tuh ïa ki taïar jong katei ka trok kaba don ha Jowai Bypass.
Ha kawei pat ka jingjia ki pulit ki la ïathuh ba u Asst. Engineer, I&E Sub-Division, MePDCL, Tura (WGH) u la phah ka jingujor pyrshah ïa ki 5 ngut ki nongshong shnong ka Kanglapara, Rangtapara bad Wajadagre (WGH) halor ka jingkynnoh ba ki la tan beaiñ ïa ka bording.
