Risa ki paidbah tang shu kular u Bah Prestone ban tuklar ïa ka tih maw tih shyiap bad ïadur masi

Shillong, Rymphang 16 : Ki paidbah kiba wan sha ka jingïalang ïalap elekshon jong ka NPP ha madan Laitkroh ha ka janmiet sngi Saitjaiñ ki la risa bad kynhoi da ka jingkmen hadien ba ki la ïoh ïa ka jingkular na u State President ka NPP Bah Prestone Tynsong ba bat ruh ïa ka shuki Symbud Myntri Rangbah ka Jylla, ba un tuklar hi dalade halor ka ishu kaba ïadei bad ka ishu tihmaw tih shyiap bad ruh halor ka jingkhang ïadur masi.
Haba kren ha ka jingïalang pan jingkyrshan na bynta u kyrtong ka party na Langkyrdem – Laitkroh Bah Rahbok Tynsong ba dei ruh u pyrsa trai jong u, u Bah Prestone u la ong, “Ko ki paidbah nongshong shnong jong ka Elaka Laitkroh ap ïa ka por, shaniah hanga uba long teng u MLA jongphi bad shaniah ruh ha ka sorkar hapoh ka jingïalam jong ka NPP ba ngin pynurlong ïa ki jingangnud jongphi khnang ba ngin ym ïap thngan ngin ym ïap ja nangne shakhmat. Kane kadei ka jingkular kaba nga kwah ban ai hakhmat jongphi mynta baroh ki paidbah nongshong shnong.”
Haba kren pat halor ka ïashu ïadur masi kaba dei kawei pat ka mat kaba ktah bha ïa katei ka thaiñ bad ki shnong ba marjan, u Bah Prestone u la ong, “Ka jingmih ïa kane ka hukum (Order) kadei ba don ki seng kiba nabar jylla kiba wan ban peitkai, ki shondur haba ki ïohi ba don ka jingïatyngkhuh ne ka jingpyni reng ki masi kyrtong. Kumta ki shon dur bad phah sha Delhi bad kumta wan ka hukum na Delhi kaba kylli ba ka Jylla Meghalaya ka leh aiu ïa kine ki mrad. Kim tip, ba u briew uba don masi kyrtong ki dei kiba riewspah bad ki pynlut da ki lak tyngka ban sumar ïa ki. Ha kajingshisha kham tip bad kham pynbit pynbiang bha ma ki ban ïa ki doktor ba peit ïa ki mrad ruh.”
Kumta, haba pynshai bniah halor kane ka bynta ruh u la ong, “Ïa kane wat pynmih ishu namar ngan kitkhlieh manga, namar ha ka por elekshon ki pynmih ishu laitphew jait khamtam kito ki lok kiba stad kiba bit ban ïa kren tang ha surok. Nga te ngam kwah ban bun ktien hynrei nga kwah ban ong tang shi kyntien, shaniah lem ha u Bahduh Prestone namar nga tip kaei kaba dei ban leh.”
Une u rangbah uba la long teng u MLA jong ka thaiñ ha shwa ban wan ka jingphiah constituency thymmai, u la ong ruh ba ka thong jong ka sorkar ka long ban pynbit pynbiang ïa ki nongshong shnong ym ban pynduk ïa ki longiing longsem.
Haba kren pat halor u kyrtong, u Bah Prestone u la ong ba lada ki paidbah ki jied ïa u kyrtong ka NPP na katei ka constituency, hadien ka 24tarik, ka thain kan ïoh ym tang ïa u MDC ba thymmai hynrei kan ïoh ruh ïa u Symbud Myntri Rangbah kum u kpa.
“Lada ym dei ba pynïakhlad ka Election Commission u Bahduh Prestone u la dei u kpa trai jongphi. Hynrei ngan ïai don ryngkat bad phi bad ai ba u Pyrsa jongnga un long ka jingkieng bad ka lynti ïaid na kane ka Elaka sha iing jongnga bad sha ophis treikam jongnga ha Secretariat ban wanrah ïa ka jingmyntoi ha ki bynta baroh jong ka elaka.
Katba na ka liang u kyrtong, Bah Rahbok Tynsong u la ong, “Nga tieng ba ïoh ki pateng ban wan kin shu tip bad kin shu ïoh sngew pateng ba ka Jaidbynriew Khasi kadei kaba kyrpang, kaba shim jait na ka Kmie bad kaba ju synshar da ki Rangbah Shnong bad ki Matabor. Kumta nga kwah ba ki longkmie longkpa kin pyrkhat bha hato phi kwah ba ki khun kin dang lah ban ïohi ïa ka jinglong kyrpang ka Jaidbynriew,” u la ong.
U ong ruh ba mynta ka shong haka jingstad jong ki ban jied ïa ki nongïalam kiba lah ban ïada bad pynkhlaiñ ïa ka jinglong kyrpang kumba leh da ka NPP.
Une u kyrtong u la ong ruh ba ka party NPP kam ju pynkulmar ïa u paidbah lane ban pynshongshit ha shnong ha thaw namar ki kwah ban pynsngewthuh ïa u paidbah da kaba pan ka jingïatrei lang na ka bynta ka ishu jong ka Jaidbynriew.
Nangta, u la ong ruh ba ka kam MDC kadei ka kam ban peit na ka bynta ban pynneh pynsah ïa ka riti dustur, ka khyndew ka shyiap bad ïa ka jinglong kyrpang jong ka jaidbynriew bad kam dei satia na ka bynta ki kam pynroi. Hynrei u ong pat ba u long uba kloi ban long ka jingkieng na bynta ka thaiñ ban ïa kren ïa ki kam pynroi bad ka sorkar lada ki paidbah ki jied bad pynjop ïa u kum u MDC ba thymmai ka Langkyrdem-Laitkroh constituency.
La ïoh ruh ïa ka jingkren ha kane ka sngi naduh ki nongïalam ba hakhmat ka party kynthup naduh Dr. Jasmine Lyngdoh President NPP Womens Wing, Bah Auspicious Lyngdoh, Bah Kennedy Khyriem bad ruh na u Bah Egenstar Kurkalang nalor kiwei kiwei.
La donlangruh ha kane ka sngi naduh ki nongïalam jong ki NPP Women’s Wing, ki nongïalam jong ki samla NPP bad ruh ki nongïalam jong ka NPP East Khasi Hills.