Ring tyrkhong ka Wah Moopun, dawa pyntreikam u Waheh Shnong da ka projek 100 klur

Shillong, ïaïong, 13: U Bah Reading War na ka shnong Latyrke, East Jaiñtia Hills District dang ha ka taiew baladep u la aiti da ka jingthoh sha u Deputy Commissioner jong ka East Jaiñtia Hills District ban pynpaw ïa ka jingsngewkhia halor ka jingsdang ring tyrkhong ka wah Moopun kaba hap hapoh ka Elaka Sutnga. Ka wah Moopun ka dei ka wah kaba ki nongshong shnong jong ka thaiñ ki ju pyndonkam ïa ka umbam umdih bad ka sum ka sait na kane ka wah.
Katkum ka jubab RTI ba la ïoh pdiang da u Bah Reading War la lap ba ka Sorkar Jylla mynta la bun snem kam pat pyntreikam satia ïa ka mang tyngka kaba T100 klur kaba la mang ban pynkhie im biang ïa ka mariang kynthup ïa ki wah, ki wahduid hapoh ka jylla.
Katkum ka dorkhas ba la aiti sha ka ophis jong u Deputy Commissioner, u Bah War u la ong ba ki nongshong shnong jong ka shnong Moolamylliang, Latyrke, Tluh, Jaraiñ, Lamyrsiang, Sakhaiñ, Mookynpad bad kiwei kiwei ki shnong ki ju leit sum leit sait ha ka wah Moopun bad ki ju pyndonkam ruh ïa ka um na kane ka wah ha ka rep ka riang hynrei mynta kane ka wah ka la sdang ban ring tyrkong bad ka um ruh ka la hiar bha ha kane ka wah.
U la ong ruh, lehse ka jingtyrkhong jong ka wah ka lah ban dei na ka daw ka jingkylla ka suiñ bneng (climate change), ka jingpyndonkam palat ïa ka um na kane ka wah bad kumba la kynnoh da ka nongshong shnong ka thaiñ ba ka don ka jingtan um palat da ki Karkhana Coke. Hynrei ban pynshisha ïa kane ka jingtyrkhong ka wah u Bah War u la kyntu ïa ka ophis u Deputy Commissioner ban pynlong da ka jingtohkit ba pura ban lap ïa ka daw tynrai halor ka jingtyrkhong jong ka wah Moopun khnang ba ki bor synshar disttrict kin pyndonkam da ki lad ki lynti katkum ka aiñ ban ïada ïa ka wah khnang ban pynduna noh ïa ka jingtan um na kane ka wah.
Halor kane, u la kyntu ruh ïa u Deputy Commissioner ba u dei ban shimkhia noh kham kloi ïa kane ka mat kaba donkam ban ïada ïa ka wah Moopun kaba long ka jingitynnad ka mariang bad kaba long ruh ka jingmyntoi jong ki paidbah nongshong shnong kiba don ha katei ka thaiñ.
Kum ban shu pyntip, u Bah Reading War, ha ki snem kiba la leit noh u ladep ban phah da ka jingthoh sha ka Sorkar Jylla ha kaba ïadei bad ka jingshah ktah jong ka wah Moopun kaba la sdang ban ring tyrkhong ha u snem 2022 da kaba kyntu ruh ïa ka Sorkar ba kan leh eiei ban pynkhlaiñ biang ïa kane ka wah da ka ba pyntreikam da ki project lyngba ka pisa kaba la mang T.100 klur tyngka kaba la don lypa naduh u snem 2019 ïa kaba la mang ban pynim biang ïa ki um ki wah bad ban ïada ïa ka mariang.
Hynrei ka Sorkar kam pat lah satia ban pynurlong ha kaba ïadei bad kane ka jingkyntu jong u Bah War.