Riewspah ka bam tynrai, da ka Nutrition Pilot Project ka lad ban kyntiew ïa ki jingbam tei met

Nongpoh, Risaw, 10: Ka Ophis u BDO Umsning C&RD Block ryngkat ka jingtreilang bad ka Meghalaya State Rural Livelihood Society mynta ka sngi ka la pynlong ïa ka jingïakop shet bala shim bynta da ki 10 ngut ki nongïashim bynta na ka Thymmei baiar CLF Women SHG Multipurpose Ltd, Umsning kaba don ruh kumba 32 tylli ki shnong bad kane kadei ka jingsdang bad kaa jingthong jong ka ophis u Deputy Commissioner ka Ri-Bhoi lyngba ka Nutrition Pilot Project ban kyntiew ïa ka ioh ka kot ki longkmie bad ka jingtip kumno ban ngi lah ban shet bad pynmih ki jait jingbam ba bun tang nala jong ki rympei iing bad ka mariang sawdong sawkun ba ngim donkam than ban shaniah ïa ki kita ki jhur ba nabar.
Ha kane ka jingïakop shet u Abhilash Baranwal Dpeuty Commissioner ka Ri-Bhoi u la wan ban shim bynta kum u kongsan ha ka jingdonlang u Bah A Myrthong BDO ka Umsning C&RD Block, ka Samla Balakyntiew Nongrum Nutritionist ka Civil Hospital Nongpoh, ka kong Ahmedaki Laloo kaba dei ka nongshet ba pawnam, ka Johan Marak Dietitian ka Nongpoh Civil Hospital lem bad kiwei kiwei ki longkmie na ki SHG bapher bapher kiba hap ha katei ka Co-operative Society.
Haba kren ha kane ka sngi u Bah A Myrthong BDO ka Umsning C&RD Block u la ong ba kane ka dei ka sienjam bad ka jingiohi jngai jong u DC ka Ri-Bhoi ban kyntiew ïa ki bam tynrai kiba don tang ha ki kper ki phrah jong ngi bad ka jingthmu ban pynlong ïa kane ka jingïakop shet ka long ban wanrah ka jingtip kumno ba ki longkmie ki lah ban shet pynbang ïa ki jhur ki jhep kiba don kylleng sawdong ka mei mariang bad ba ngim da dei bad donkam ban shaniah than tang na ki jhur ba nabar.
U la ong ruh haba ngi bam ïa ki jingbam ba ngi shet ha iing ngin shet naduh ka dohnud da kaba pyndonkam da kine ki jhur kiba lah ban thung khlem da pyndonkam dawai kiba ai ka jingkoit jingkhiah bad kane ka project kan ïaid kumba 6 bnai lynter bad khmih lynti ba kane ka prokram kan long kaba jop, khamtam ban kyntiew ïa ka ioh ka kot ki longkmie kiba lah ban buh pat da ki dukan bam kiba biang bad kiba lah ban pyndonkam tang na ki jhur ba ngi ioh na ki kper ki phrah lajong.
U DC ka Ri-Bhoi haba kren ha katei ka sngi u la ong ba ka jingthmu baroh jong kane ka prokram ka long ban ioh ïa ki jingbam tei met namar ka ioh ka kot, ka jingnang jingstad baroh ka sdang na ka jingkoit jingkhiah namar lada u briew um don ka met ba koitba khiah ka long kaba eh ïa u briew ba un kiew shaphrang dei halor kane ka phang kum ka ophis u DC ka la sdang ïa kane ka project namar kumba la sakhi ha kine khyndiat snem bala leit noh bun na ki briew ki kyntait ïa ki jingbam tei met kiba lah ban ioh tang na ki kper ki phrah lajong.
U la ong ruh ba lyngba kane ka project kan long ruh ka jinghikai ba ngi lah ban ioh bun ki jingbam na kane ka jylla lajong kiba tei met bad kiba lah ban ai ka jingkoit jingkhiah ba ngim donkam ban pynlut pisa bun khamtam lada ngi smat ban thung ban tep namar kine ki jingbam tynrai ki dei kiba tei met.