Reservation Policy : Hap pule sani bha jai shwa ban shim rai ïa ki jingai jingmut ka Expert Committee

By Mawphor Editor On Sep 9, 2025

Shillong, Nailur 08 : Ka sorkar jylla ka la rai ba shen kan sa shim ïa ka rai kaba khatduh haba ïadei bad shibun bha ki jingai jingmut kiba la phah da ka Expert Committee halor ka State Reservation Policy ne ka bhah thungkam thungjam ha ka jylla.
Ïa kane ka rai la shim ha ka jingïalang jong ka Kynhun Myntri kaba long ha ka step Sngi Nyngkong shwa ban sdang ka Dorbar jong ka Ïing Dorbar Thawain ka Jylla.
Haba kren bad ki lad pathai khubor, u Nongai ktien ka sorkar jylla, Bah Paul Lyngdoh u la ïathuh ba ha kane ka kaiphod ka don ïa ki jingai jingmut bapher bapher ha kaba katto katne na kine ki dei kiba thymmai.
“Ka Kynhun Myntri ka la shimkhia ïa ka kaiphod bad ki jingai jingmut bapher bapher bad ka la rai ban pule bniah mardor ïa ka kaiphod. Ka dei ka kaiphod kaba bun bha kaba la don bun hajar piej. Ngin shim por ban pule ïa ki jingai jingmut bapher bapher bad ngin sa lah ban shim rai hadien ba ngi la dep ban bishar bniah ïa kine ki jingai jingmut bapher bapher na ka Committee,” la bynrap shuh shuh u Myntri Sorkar ka Jylla Bah Paul Lyngdoh.
U Myntri u la ïathuh ruh ba ïa mynta ki dang shu ïoh pdiang ïa ka kaiphod kumta, kumta ki la shimkhia ïa ka kaiphod bad kin sa shim ïa ki sienjam kum ka kynhun myntri halor ki jingai jingmut bad ki jingkdew bapher bapher. Katkum ka jingong jong u, don ki mat kiba dei kiba la don lypa bad don pat kiba dang thymmai.
“Na ka liang u Chief Secretary u la ïathuh ïangi halor kane ka kaiphod bad kumta kum ki dkot jong ka Kynhun Myntri ngi ruh ngi don la ki jong ki jingkylli, ki jingkdew bad ki mat kiba donkam ban ïoh jingshai. Kumta kan shim por ha shwa ba ngin ïoh ïa ka rai kaba khatduh halor kane ka kaiphod,” u la bynrap biang.
U ong ruh ba ïa kane ka bynta ka sorkar kan sa lah ban shim rai tad hadien ba la dep lut ka jingïatai bad ka jingbishar bniah lang da kaba shim lang ia ka jingpynsngew jong kiba bun balang.
Na ka liang u Myntri u la ïathuh ruh ba namarba ka kaiphod ka dang poi ha u Jylliew bad ka Dorbar ka dang long mynta u Nailur, kumta kyllum lang kan dang kham shim por nalor ba kadei ka kaiphod kaba la bun. “Ngim kwah ban leh kano kano kaba bakla haba kaban shim rai naba kawei pa kawei ka jingkdew bad ki jingai jingmut ki don la ka jong ka dor bad ka jingkdew bad kumta donkam ban da leh sani jai,” u la bynrap biang.