Shillong, K’lyngkot, 4: U MLA jong ka National Poeples Party (NPP) u SG Esmatur Mominin uba mihkhmat ïa ka Phulbari Constituency u la resaiñ ha ka sngi Balang bad katkum ka thymmei khubor la ïathuh ba une u MLA un sa leit ban pynïasoh bad ka Trinamool Congress (TMC) ha kine ki khyndiat sngi ki ban sa wan.
U Mominin u la resaiñ na ka jinglong MLA da kaba aiti ïa ka shithi resaiñ ha u Lamphang ka Iingdorbar Thawaiñ ka Jylla u Bah Metbah Lyngdoh.
Ha ka jingïakren lyngba ka telephone na Phulbari, u Mominin u la ong, “nga la ïohi ïa ka rukom treikam jong ka Sorkar ba la ïalam da ka Mamta Bannerjee bad nga la ïohi ruh kumno ki paidbah, khamtam kiba duk bad kiba la shah iehbeiñ ki la ïoh jingïarap shikatdei eh. Nga sngew ba ka TMC ka dei ka paty kaba lah ban ai khambha ïa ka jingshakri bad nga don ruh ka jingkyrmen hapoh ka jingïalam jong u Dr. Mukul Sangma bad u Bah Charles Pyngrope, lada ailad ban shakri bad ban synshar, ka Jylla Meghalaya kan sa long ka jylla kaba kiew shaphrang.”
Haba kylli balei um shym la bud ïa ki dienjat jong ki paralok jong u, u Benedict bad ka Ferlene kiba la leit pynïasoh bad ka BJP, u Mominin, u la ong, “ha,oid, ka BJP ruh ka la phah ïa ki ksiang hynrei ynda nga la ïasyllok bad ki nongkyrshan bad ïa ki paidbah ka Phulbari, nga kwah ban ong ba shispah na ka shispah nga sngew ba ka TMC ka dei ka party kaba biang bad nga hap ban burom ïa ka jingkwah jong ki paidbah bad namarkata ngan shakri ïa ki paidbah jong ka Constituency jong nga bad ïa ka jylla Meghalaya lyngba ka TMC. Ngan sa pynïasoh lashai hi bad ka TMC ha Phulbari.
Kane ka jingshim rai jong u Mominin ban pynïasoh bad ka TMC ka long hadien ba ka NPP dang shen ka la pdiang burom ïa u Abu Taher Mondal uba long u MLA barim ka Seng Congress bad pynbna ruh ïa u kum u kyrtong ka NPP na Phulbari Constituency ha ka elekshon ka ban sa long ha u snem 2023. Shwa kane, lai ngut ki MLA ba la shah sospon jong ka Seng Congress ki la resaiñ noh na ka jinglong MLA shwa ban pynïasoh bad ka National Peoples Party (NPP). Kine ki kynthup ïa ka Dr. M. Ampareen Lyngdoh, u Bah Mahendro Rapsang bad u Bah Kimfa S. Marbaniang.
Ha kine ki khyndiat sngi, arngut ki MLA jong ka Peoples Democratic Front (PDF) kiba kynthup ïa u Bah Hamletson Dohling bad u Bah Jason Sawkmie Mawlong lem bad u MLA jong ka Hill State Peoples Democratic Party (HSPDP) u Bah Samlin Malngiang kin sa pynïasoh ïalade bad ka NPP.
Katkum ka jingtip ba la ïoh lum, u Bah Hamletson Dohling un sa pynïasoh bad ka NPP ha ka sngi Saitjaiñ mynta ka taiew, katba u Bah Jason Sawkmie Mawlong un sa pynïasoh ha ka sngi Thohdieng bad u Bah Samlin Malngiang un sa pynïasoh ha ka 10 tarik mynta u bnai.
Haduh mynta, arngut ki MLA jong ka NPP kiba kynthup ïa ka Ferlin Sangma bad u Benedic Marak ki la resaiñ na ka jinglong MLA bad mih noh na ka NPP ban leit pynïasoh bad ka Bharatiya Janata Party (BJP). Nalor kine ki arngut, u Bah Himalaya Shangpliang u la resaiñ na ka jinglong MLA bad mih noh na ka Trinamool Congress leit ban pynïasoh bad ka BJP.
Ha ka sngi ba la pdiang ïa kine ki lai ngut sha ka BJP, u u Samuel Sangma ruh u la pynïasoh bad ka BJP ha ka jingïalang kabn la long ha New Delhi dang shen.
Katkum ka tyllong khubor, sa u MLA jong ka Hill State Peoples Democratic Party (HSPDP) u Bah Renikton Lyngdoh Tongkhar uba long ruh Myntri ka Sorkar Jylla u la pynkhreh ban iehnoh ïa ka jinglong MLA shwa ban leit pynïasoh noh bad ka UDP.
Ki ar ngut ki MLA ka Congres ba la shah sospon kiba kynthup ïa u MLA ka Nongpoh Constituency u Bah Mayralborn Syiem bad u MLA ka Mawlai Constituency u Bah Process T Sawkmie ki la pynkhreh ban iehnoh ïa ka jinglong MLA shwa ban leit pynïasoh bad ka UDP. Sa u Bah Lambor Malngiang ruh u la pynkhreh ban pynïasoh bad ka UDP ban ïakhun ha ka elekshon ka ban sa long.
Ka khubor ba thikna ka la ïathuh ba u MLA jong ka KHNAM na North Shillong Constituency u Bah Adelbert Nongrum ula pynkhreh ban ïakhun ïa ka elekshon ha u snem 2023 na ka Voice of the People Party (VPP).
