Resaiñ kynsan 2 ki MLA NPP bad 1 na ka TMC, pynkhreh ban ïasoh BJP

Shillong, Naiwieng 28 : Arngut ki MLA jong ka National People’s Party (NPP) bad uwei pat na ka All India Trinamool Congress (AITC) ha kane ka sngi Nyngkong ki la resaiñ noh kum ki dkhot jong ka Ïing Dorbar Thawaiñ ka jylla.
Kitei ki arngut ki MLA ka NPP kiba resaiñ ha katei ka sngi ki kynthup ïa u Benedict Marak, MLA jong ka Raksamgre bad ka Ferlin CA Sangma MLA jong ka Selsella. Katba na ka TMC dei u Bah HM Shangpliang, MLA jong ka Mawsynram. Kitei baroh lai ngut ha kane ka sngi ki la leit ban aiti noh ïa ka shithi resaiñ ha u Lamphang ka Ïing Dorbar Thawaiñ ka jylla, Bah Metbah Lyngdoh ha Assembly Secretariat, Khyndailad.
Haba kren bad ki lad pathai khubor, na ka liang u Bah HM Shangpliang u la kubur ba baroh lai ngut ki la dep ban aiti ïa ka shithi ba ki la resain noh na ki party jong ki bad na ka liang u Lamphang ruhu la pdiang ïa katei ka jingresaiñ noh jong ki.
Nalorkata, u la pynbna ruh ba baroh ki don ka jingthmu ban leit ïakhun noh na ka tiket BJP ha ka elekshon MLA kaban wan. “Baroh lai ngut nangi, ngi thmu ban pynïasoh sha ka BJP bad baroh lai ngut nangi, ngi don tang kawei ka jingmut, kata na bynta ka roi ka pa ha ka jylla.”
Shuh shuh u ong ruh ba ka jylla ka donkam shibun ki kam pynroi bad kumta ki dang don shibun ban leh ha kane ka jylla nalor ba ka la mad lypa ïa ki jingeh la ka long ha ka pla tyngka bad ruh ha ki liang baroh khamtam eh ha ka suk ka sain.
Da kaba kyntu ïa ki paidbah ba kin pdiang ïa ka BJP ban wanrah ïa ki kam pynroi ha ka jylla, u Bah Shangpliang u la ong, “Ka BJP ka dei ka party kaba trei na bynta ki kam pynroi bad kumta, ngim don ei ei hynrei ngi donkam ïa ki kam pynroi na ka bynta ka jylla dei na kata ka daw ngi pynïasoh sha ka BJP.”
Shuh shuh u ong ba ki lai ngut ki MLA kim sngewtynnad ban kdew kti ïa ka sorkar jylla bad ki jingbymlah treikam bha jong ka. “Hynrei ka por kan sa poi ba ynda la poi ka por ïalap elekshon ha kata ka por ngin sa wanrah ïa ki mat sha ki paidbah,” u la ong.
Haba ïaroh ïa u Myntri Rangbahduh ka Ri u Narenda Modi ba u lah ban wanrah jingkylla ha Meghalaya, utei u MLA ba la resaiñ u la ong, “Balei ngi pynïasoh noh sha ka BJP kadei namar ngi ïohi ba u Modi u lah ban wanrah bun ki jingkylla. Kumta ngi don ka jingngeit ba kine baroh kin wanrah jingkylla ha Meghalaya ruh. Peit ïa ka jingkyrduh kam ba ngi kynduh ha ka jylla. Lada u Myntri Rangbah ka Assam u lah ban sai haduh 25,000 tylli ki shithi thungkam ha ka shisngi balei ngi pat ngim lah. Kaei kaba khang ïa ka Meghalaya ban leh kumta ban ai kam ïa ki samla.”
Halor ka jingkylli, u la ong, “Ha ka por ba ngi ïasoh sha ka TMC ngi la khmih lynti ba ka TMC kadei ka party kaba lah ban wanrah jingkylla hynrei ha ki bnai kiba bud pat ngi ïohi ba kam long satia kumta. Ngi don hangne ban wanrah ïa ki kam pynroi sha ki paidbah bad kiba donkam hok shisha ïa ka khnang ba man la ki longïing kiba don ha ka jylla kin myntoi ïa ki skim ba ka sorkar NDA ka ai sha ki paidbah ka jylla.”
Ha kawei ka liang, ka Ferlin ka la ong ba kam don satia kano kano ka jingthut bad ka NPP hynrei ka jingpoi jong ka sha ka sainpyrthei kadei namar ban wanrah kam pynroi ïa ki paidbah. “Hynrei haba ngi don bad ka liang synshar ngim hun satia ïa kata bad kumta ngi la hap ban wad lad kiba kham biang kumta ngi la rai ban pynïasoh noh sha ka BJP, ka party kaba peit ïa ki paidbah bad khamtam ïa ki nongrep.
Haba kdew ïa ka constituency, ka la ong, “Ngam don tang kawei ka college ruh haba nga dei ka dkhot jong kane ka sorkar ngam shym la ïoh tang kawei ka community college, kumta kidei kine kiei kiei kiba pynlong ïanga ban mih noh na ka liang synshar ban pynïasoh sha ka party kaba kham heh.”
Wat na ka liang u Benedic ruh u la pynpaw ba ki paidbah mynta ki la ïoh kumno ki kam pynroi ki poi bad kumta ki la tip bad kwah ïa ka BJP ha Meghalaya. U ong ruh ba dei ki paidbah nongkyrshan kiba tyrwa bad phah ïa u ban leit ïasoh noh sha ka BJP.