Shillong, Jymmang 31 : Ki nongïalam jong ka United Democratic Party (UDP) ki la kyndit lut hadien ba u General Secretary jong ki, u Dr. Jemino Mawthoh u la resain kyndit kyndit na ka party kaba u la don mynta la kumba 15 snem kum u nongïalam.
Une u rangbah uba dei ruh u MLA barim ka Nongthymmai u la rai ba ka jingmih noh jong u na ka UDP kadei na ka daw shimet bad ruh na ki daw bym lah shuh ban kiar.
U Dr. Jemino u la phah ïa ka shithi iehnoh kam sha u President Rangbah ka party, Bah Metbah Lyngdoh ha ka 20tarik u Jymmang da kaba ong, “…na ki daw bym lah kiar nga kwah ban weng noh ïa ka jinglong dkhot na ka party bad ruh na ka kam kaba nga bat kum u General Secretary naduh mynta.”
Shuh shuh u la ong ruh ba u dap da ka jingkmen ba u ïoh ban shakri ïa ka party kum u MLA bad ruh kum u Working President naduh u 2014 bad kum u General Secretary pat naduh u snem 2016. “Nga kwah ban pynpaw ïa ka jingsngewnguh kaba khraw na ka bynta ki lad ki lynti kiba ka seng ka la ai ha nga ha kine ki snem baroh ban shakri ïa ki paidbah jong ka constituency jong nga bad ruh ïa ka jylla. Nga sngew burom ïa ki para ba trei lang ha ka party ha kine ki snem baroh,” u la ong.
Shuh shuh u la ïai ban da kaba ong, “Kane ka rai kadei ka rai shimet bad nga skhem ha ka nongrim halor kane.”
Une u MLA barim u la pyntip ruh ba u la phah ïa ka jingiehnoh kam kum u Adviser ka tnad Planning, Investment Promotion and Sustainable Development ka Sorkar Meghalaya.
Haba pyntikna ïa kane ka khubor, u Nongïalam ka UDP uba dei u nongïalam liang pyrshah ka KHADC u Bah Titosstarwell Chyne u la ong ba um don jingtip eiei kaei kaba la pynlong ïa u Dr. Jemino ban shim kynsan ïa kane ka rai kaba tyngeh ban mih noh na ka seng.
Haba kylli, u Bah Titos u la kam ba ha ka jingshisha baroh ka jingtreikam ha ka party ki long kiba ïaid beit ïaid ryntih.
Ha kawei pat ka liang ki la mih bun ki khubor ba u Dr. Jemino u lah ban pynïasoh noh sha kiwei pat ki seng saiñpyrthei. Tangba ïa kane pat ym pat lah satia ban pyntikna namar haduh mynta ym pat ïohlad satia ban ïa kren bad u.
