Shillong, Naitung 06 : Ki Pulit ka East Jaintia Hills kila rejister case hi dalade (suo motu case) hadien ka jingiap jong uwei u briew namar ka jingkynnoh pynbthei bom dynamite ha kawei ka par dewiong ha East Jaintia Hills.
U Superintendent of Police Vikash Kumar ula pynthikna ha ka sngi Ba-ar ba tang uwei u briew ula iap bad la ithuh kum u Ashok Tamang, uba la khlad na ka jingpdung ding hapdeng ka jingsumar ha Shillong Civil Hospital.
Ula bynrap ba ki Pulit kila register ïa ka suo motu case hapoh ka kyndon 105 jong ka Bharatiya Nyaya Sanhita (BNS) halor kane ka jingjia.
“Haba pynshong nongrim ïa ka jingpyntip shuwa ban iap jong u Ashok Tamang…ngi la register ïa ka suo motu case hapoh ka kyndon 105 BNS” ong une u Heh Pulit uba pyntip ba ka jingtohkit mynta ka la ïaid shakhmat ban pynthikna ruh ïa ka jaka ba jia kane ka jingbthei bom bad kiwei kiwei.
Ula pyntip ba u Tamang shuwa ba un iap ula ïathuh “Hashuwa ka jingiap, ula pyntip hakhmat ki doktor ba u dei uba peit ïa ka jingpynbthei bom dynamite ha ka jaka trei, hynrei u khlem ïathuh pat ïa ka jaka lane kumno ka jia. U khlem kren eiei shaphang ka jingtih dewiong, ula ïathuh ba kane ka jingjia kala jia ha ka jaka trei jong u”.
Haba kylli, u SP ula ong “Hooid, ka Committee u Justice BP Katakey kala pan ïa ka kaiphod halor kane ka jingjia. Ngin sa ai ïa baroh ki jingtip namar ki don artylli kiei kiei halor kane ka kam-ka video bad ka jingiap jong u Ashok Tamang. Ngin hap ban shong bishar ïa baroh arbynta namar kine ki dei kiba jia ha la ka jong”.
Halor ka jingkynnoh ba ka video ka don jingïadei bad ka jingjia ha shnong Thangsko, u Kumar ula ong “Kat kum ka jingleit tohkit, kam dei satia na kane ka shnong…u Rangbah Shnong bad kiwei ki nongkitkam ka shnong Thangsko kila pyntip ba kim ithuh satia ïa kine ki briew ha ka video, u nongkren lane ka jaka. Ngim lah ban pynthikna ba ka jingbthei dynamite ka jia ha katei ka jaka”.
Ka jingtohkit ki Pulit ka ïathuh ba ïa u Tamang la ïalam ban leit sumar nyngkong ha Sutnga Community Health Centre (CHC) ha ka 23 tarik Nohprah 2025 ryngkat ki dak ing. La pynkynriah ïa u hadien sha Shillong Civil Hospital bad ula khlad noh ha ka 1 tarik Kyllalyngkot.
Kat kum ka jingong u SP, ka Sutnga CHC ka khlem pyntip satia sha ki Pulit halor kane ka jingjia. ïa ki Pulit la pyntip da ki Pulit kiba don hapoh ka Police Booth jong ka Shillong Civil Hospital, kaba lam sha ka jingregister ïa ka case.
U Kumar u pyntip ba ki Pulit kila sdang shaid shaid ïa ka jingtohkit ban pynthikna ïa ki jingshisha baroh bad kiei kiei kiba jia kiba lam sha kane ka jingiap.
