Rashtriya Poshan Maah:La pynlong ïa ka awareness prokram halor Ka jingbam ba tei met, ka koit ka khiah bad ka jinglong kynthei

By Mawphor Editor On Sep 16, 2022

Mawkyrwat, ‘Nailur 15: Ka ophis jong ka Child Development Project Officer (CDPO) bad ka jingïadon bynta lang bad ka ophis jong ka District Programme Officer, ICDS Cell, Nongstoin/Mawkyrwat mynta ka sngi ki la pynlong ïa ka jingai jinghikai halor kumno ban bam ïa ki jingbam kiba tei met na ka bynta ban ïoh ka met ka phad kaba koit bakhiah bad ruh ki jingbatai shaphang ka jinglong kynthei bad ka jinglehkhuid ha kaba la long ïa ka program ha Community Hall jong ka Mawkyrwat.
Haba kren ha ka jingïalang ka kong B. Nengnong kaba long ka District Programme Officer, ICDS Cell, Nongstoiñ bad Mawkyrwat ka la pynkynmaw ba ïa kane ka Rashtriya Poshan Maah la ju rakhe naduh u bnai Nailur jong u snem 2018 ter ter la rakhe ruh mynta u snem da ka jingthmu ban rat dyngkhong ïa ka jingduna bam ha ka met kaba ktah ïa ka koit ka khiah jong ki longkmie ba armet, kiba dang lung khun, ki khyllung ki khynnah bad ki samla kynthei kiba dang heh dangsan bad kaba long ruh ka daw bah jong shibum ki jingpang kum ka jingduna snam bad kiwei kiwei. Haba ban jur halor ka jingduna bam ha ka met ka la batai ba ka met ka donkam ïa ki jingbam kiba biang bad kiba tei met kiba don ha ki ïa ki vitamins, ki minerals bad kiwei kiwei kiba lah ban ïada na shibun ki jingpang.
Ha kajuh ka por ka la pynshai halor ka 1000 sngi kaba long ka prokram kaba la pyntreikam kaba ka jingthmu ka long ba ki kynthei ki dei ban register bad ban sumar bha ïa lade naduh ka por ba ki dang pun haduh ba u/ka khyllung ki dap 2 snem ei ei bad ha kine ki por ïa ki khyllung hap ai tang da ka buiñ kmie (exclusive breast feeding) bad ban bynrap da ki complimentary food hadien ba ki la tam ïa ka 6 bnai shaneng ban ban ai ïa ki tika katkum ka por ba la buh. Shuh shuh ka la ïathuh ba ki aganwadi centres ki ju ai ïa ki bam rap kiba la tip kum ka Supplementary Nutrition ïa ki khyllung kiba hapoh ka 6 snem, ïa ki longkmie ba armet bad ba dang lung khun bad ïa ki khynnah kynthei kiba dang khie dang san kiba la pep skul noh khnang ba kin lait na ki jingpang duna snam bad ha kajuh ka por ka la pynshlur ïa ki ban bam ia ki jingbam kiba tei kiba lah ban ïoh na ki kper ki prah khnang ba kin long kiba koit na khiah namar ka jingkiew ha ka ïoh ka kot ha shnong ha thaw bad ha ka ri baroh kawei ka shong eh ha ka koit ka khiah jong ka longïing longsem.
Shuh shuh ka la pynshlur ïa ki longkmie ban leit kha barobor ha ki jaka sumar ha ka por kaba biang khnang ban lait na ki jingjia kiba sngewsih. Ka la pynkynmaw ruh ïa ki jingsniew bad ki jingeh kiba mih na ka shongkha khynnah da kaba sneng ïa ki khynnah skul ban kiar na kiba sniew bad ban minot thiaw bad pyndep ïa ki jingpule na ka bynta ban kiew irat ha ka jingim bad ban poi sha ka thong kaba ki thmu bad ban ïaleh ban kiar na ka shongkha khlem pat dei por.
Ka kong B. Snaitang, Psychiatric Nurse jong ka ophis District Mental Health Programme ka la ai jingbatai kaba shai halor ka jinglong kynthei da kaba kyntu ïa ki kynthei ban lehkhuid lehsuba ha ka por ba wan ka jinglong kynthei bad ban sumar bha ïa lade khnang ban lait na ki jingpang kiba bun jaid.
Ka la hikai ruh ïa ki ban bam ki jingbam kiba tei, ban sum ban sait bad ban kiar na kaba bret pathar ïa ki tiar kiba ki pyndonkam ha ka por ka jinglong kynthei kiba lah ban wanrah ïa ka jingpang Hepatitis B bad C. Ha kajuh ka por ka la ïathuh ïa ki khynnah ba ka ophis jong ki, ka ju ai ïa ka Career Guidance Counselling da kaba pynshlur ïa ki khynnah ban wan shakhmat ban shim ïa kane ka kabu na ka bynta ka jingmyntoi jong ki hi lashai la shisngi.
Ha kane ka sngi ka la don ruh ka jingïakyntip ne Quiz Competition ha kaba ka Maharam Government Higher Secondary School, Mawkyrwat kaba la ïoh 27 points bad ïoh ïa ka kyrdan kaba nyngkong, ba la pynbud da ka Little Star Higher Secondary School, Mawkyrwat kaba la ïoh 17 points bad wan ha ka kyrdan kaba ar katba ka Nativity Higher Secondary School, Mawkyrwat kaba la ïoh 12 points ha ka kyrdan kaba lai.
Kham ha shwa ka kong H. Sahkhar, Child Development Project Officer, ICDS Project ka la ai ïa ki kyntien pdiang sngewbha katba ka kong E. Wahlang, Lady Supervisor, ICDS, Mawkyrwat ka la ai ïa ki kyntien khublei.