Ranji Trophy: Thaw histori u Akash ïalade, khyrwit 6 tylli ki six ha ka shi ober; lamkhmat ka Meghalaya da 526 ron ïa ka Arunachal

Shillong, Naiwieng 08: U Akash Chaudhary ka Meghalaya, u la pynsah kynmaw ïalade ha ka histori hadien ba u la long tang u nongtied u balai ban thlieh hynriew tylli ki 6 ron (six) ha ka shi ober ha ka lympung kriket kaba la paw ha ka sngi kaba ar jong ka jingïalehkai plate group jong ka Ranji Trophy 2025-26 pyrshah ïa ka Arunachal Pradesh ha Surat.
U Akash u la lah ban khyrwit naphang khlem jingmap haduh 6 tylli ki six na ki bol jong u Limar Dabi, da kaba bud ïa ki dienjat jong u Garry Sobers bad u Ravi Shastri. Ka shiteng spah ron (half centuri) jong u, na ki 11 tylli ki bol, ka dei ruh kaba stet tam ha kane ka rukom ïalehkai (format).
Ka Meghalaya ka la pynkut ïa ka pali tied kaba nyngkong (1st Inning) da kaba kamai 628 ron bad hap noh 6 wiket hadien ba ka la jop ïa ka jingkynting pisa (toss) hynnin ka sngi bad ka la jied ban tied nyngkong. Ki la pynkhreh na ka bynta ka jingjop kaba khraw namar ba ki la pynkut ïa ka Inning kaba nyngkong jong ka Arunachal tang na bynta 73 ron bad pynbor ruh ïa ka ban bteng ïa ka pali tied kaba ar ha kajuh ka sngi. Ha ka Inning kaba ar ka Arunachal ka la kamai 17 ron bad hap 3 wiket, kaba dang pynsah dien ïa ki haduh 526 ron.
U Arpit Bhatewara u la kynjoh ïa ar tylli ki spah ron (double centuri) hynnin ka sngi bad u la khyllem noh na ka bynta 207 ron (ba la kamai naki 273 bol, 23x4s, 4x6s). Ha kawei pat ka liang, u Kishan Lyngdoh, u la shah pynhap noh hadien ba kamai 119 ron (naki 187 bol, 14x4s, 1×6). Kine ki arngut ki la lah ruh ban kamai spah ron ha ka jingïalehkai pyrshah ïa ka Sikkim ha nongbah Shillong ha ka taïew ba la dep
Uwei pat u nongtied ba tyngshaiñ u dei u Rahul Dala (guest professional), uba la iehnoh shadien ïa ka jingïalehkai kaba duna na ki ar tylli ki inning ba khatduh jong u ban kamai 144 ron tang na ki 102 tylli ki bol (12x4s, 9x6s).
Ha ka liang ki nongkawang bol jong ka Meghalaya, u Aryan Borah u la khur 4/16, u Dippu Sangma 2/16 bad u Aaron AR Nongrum 2/28 ha ka jingïalehkai ba nyngkong jong ki ha Arunachal. U Swastic Chettri (1/3) bad u Akash (1/10) ki la long kiwei napdeng ki nongpynhap wiket jong ka kynhun. Nangta u Akash u la khur 2/7 hadien ba ka Arunachal ka la shah pynbor ban shimti ïa ka pali tied kaba ar.
Kane ka rukom ïalehkai kaba kyrpang, khamtam eh u Akash, ka la pynkmen shikatdei eh ïa u President ka Meghalaya Cricket Association, u Nababrata Bhattacharjee, uba la sakhi ïa une u rangïalehkai all-rounder ka Meghalaya ba u la kiew naduh ki sngi ba u dang ïalehkai kriket kum u samla.
“Ngi la ïohi ïa ka jinglah jong u kum u nongïalehkai kriket ha ka por ba u dang samla bad ngi la ai mynsiem ïa u. Um dei satia u briew uba khlem akor bad uba aiti lut ïa ka kriket. Mynta u dei u nongïalehkai all-rounder ba janai bha,” la ong u Bhattacharjee, da kaba bynrap, la ka long kumno kumno ruh ka liang pyrshah, ban thlieh hynriew tylli ki six ha ka shi over kam dei ka kam kaba suk, kaba la pawshai namar ki dang duna kiba la lah ban pynurlong ïa ka.
Ki jingïaroh ki la tuid ruh na kiwei pat ki dkhot ka MCA, ba kynthup ïa Honorary Secretary Rayonald Kharkamni, Shillong Cricket Association bad President barim ka MCA, kumjuh ruh na u Myntri Rangbah ka Meghalaya, u Conrad K Sangma.