Shillong, Kyllalyngkot 20: U Ram Gurung u la lah ban khur haduh 6 wicket marwei bad shah tied tang 15 ron kaba la long ka jingkyrshan ïa ka Meghalaya ban pynliem ïa ka Nagaland lyngba ka inning bad 128 ron ha ka sngi ïakhun ba ar jong ki ha ka lympung Ranji Trophy plate group kaba la long ha MCA Ground hynnin ka Sngi.
Nalor u Ram, u Akash Kumar Choudhury, ruh u la lah ban ïalehkai bha ha ka bol da kaba pyndep ïa baroh ki Inning da kaba khur 10/79 – hadien ba u la ïoh pynhap 3 wicket hynnin ka sngi.
Shuwa kane, u Jaskirat Singh Sachdeva u la lah ban tyngshaiñ bha ïalade ha ka tied hadien ba u la kamai 75 ron na ki 124 bol. Baroh arngut, ma u lem bad u Ram ki dang mih madan ha ka samoi lehkai kaba nyngkong jong ka Ranji Trophy hynrei ka rukom ïalehkai jong ki pat ka long kaba i shongkun.
Haba phai dien, ka Nagaland ka la shah pynkut noh da tang 72 ron ha ka sngi sdang ïa ka inning tied kaba nyngkong, ha kaba ka Jylla ka la jubab da kaba kynjoh 196 ron, hap 7 wicket ha ka tied. Hynnin ka sngi, ka Meghalaya ka la lah ban kyntiew biang sa 108 ron ban pyndep ïa ka inning tied kaba nyngkong jong ka da 304 ron shuwa ban shah pynhap baroh, kaba la ailad ïa ka kynhun ban ïoh lamkhmat haduh 232 ron. Katba ka Nagaland ka la shah pynkut noh da tang 104 ron ha ka inning tied kaba ar jong ka.
Ka jingtbit jong ki rangkawangbol ka Meghalaya kiba thrang ïa ka jingjop, ka la buh jingeh ïa ka Nagaland ban kyntiew ïa ka ron khnang ban kynjoh sha katei ka thong ba la buh. Dei u Akash u ba la lah ban pynhap wicket ha ka over ba hynriew katba hadien kane ka Nagaland ka la ïoh ban kyntiew da 52/2, hynrei ki 8 wicket ba shadien ki la shah pynkhyllem noh bad ïohlad ban kamai tang 52 ron, ka jingïaroh ka long sha u Ram bad ruh sha u Lerry Sangma, kiba la lah ban nym pynhap sha madan ïa ka bol ha ka por ba ki ïohkem. Ka kynhun ïalehkai jong ka Meghalaya kan sa hap ban pynkhreh biang ïalade ban ïakhun pyrshah ïa ka Mizoram, ka ban sdang naduh ka 26 tarik u Kyllalyngkot ha Anand, Gujarat.
