Shillong, Risaw 14: Ka jingïalehkai jong ka Ranji Trophy kan wanphai biang ha nongbah Shillong na ka bynta ka samoi 2025-26, ha kaba ka Meghalaya kan pynkhreh ban ïa aireng pyrshah ïa ka Mizoram ha ka jingïalehkai plate group ban pynlong ha madan kriket jong ka MCA kaba ha Polo naduh kane ka step sngi Balang, 15 tarik Risaw.
Ka jingïalehkai kan sdang naduh ka por 8 shiteng mynstep bad yn pdiang ruh ïa ki nongpeitkai kiba kwah ban sakhi.
Uwei na ki rangïalehkai ba kynsai tam ha ka tied jong ka jylla, u Kishan Lyngdoh un ïalam biang sa shi sien ïa ka kynhun kum u kapten, ha kaba u nongkawang bol ba stet (fast bowler) u Akash Kumar Chaudhary un long u symbud kapten. U Moisten Ch Marak u la shah jied kum u head coach.
U Ajay Duhan u la shah pynsah ha ka samoi kaba ar kum uwei na ki nongïalehkai professional jong ka Meghalaya, katba u Rahul Dalal pat u la shah pynrung kum u rangïalehkai ba thymmai. Ka jingpynrung ïa kine baroh arngut ka la ïoh ïa ka jingmynjur jong ka BCCI. U Rahul, u nongtied uba la kha ha Haryana, u don mynshwa ka jingshemphang ban ïalehkai ha ka thaiñ Shatei Lammihngi, ha kaba u la mihkhmat ïa ka Arunachal Pradesh haduh u snem 2023-24.
Mynta u snem ka Meghalaya ka don ha ka plate group ryngkat bad ka Bihar, Arunachal Pradesh, Sikkim, Manipur bad Mizoram. Tang ar tylli ki kynhun kiba wan hakhmat eh ha ka round robin stage kin ïa aireng pyrshah ha ka final jong kane ka plate group.
Ka thup kynhun jong ka Meghalaya ki long: Aaron AR Nongrum, Akash Chaudhary (VC), Arien B Sangma (WK), Arpit Bhatewara (WK), Aryan Borah, Bamanbha Shangpliang, Bijon Dey, Chengkam Sangma, Dippu Sangma, Jaskirat Singh Sachdeva, Kishan Lyngdoh (C), Kush Agarwal, Swastic Chettri, Ajay Duhan (BCCI-approved guest player), Rahul Dalal (BCCI-approved guest player)
Support staff: Moisten Ch Marak (Head Coach), Pyntngen Mark A Swer (Assistant Coach), Surojit Biswas (Physio), Vikash Singh Chauhan (Trainer), Banteibor Lyngdoh (Manager)
