Shillong, Naiwieng 03: Ka Meghalaya ka la mad ïa ka sngi kaba bha bad kaba seisoh ha ka tied ha kaba u nongïalehkai ba nabar (guest player) u Ajay Duhan u la lah ban kamai ïa ka spah ron kaba nyngkong na ka bynta ka kynhun ryngkat ka jingnohsynñiang kaba 50 ron na u Swastic Chettri ha ka Ranji Trophy 2025-26 plate group pyrshah ïa ka Bihar, ha Patna.
Tad haduh kaba kut jong ka sngi kaba lai jong ka jingïakhun, ka Meghalaya ka la lah ba kan kamai 235 ron da kaba hap noh 4 wiket ha ki 82 ober, kaba mut ba kane ka jingïalehkai ka lah ban kut ha ka jingïakhaid.
Ka Meghalaya ka la duh noh ïa u Arpit Bhatewara tang na bynta 1 ron hynrei u Bamanbha Shangpliang u la ïalehkai bha ban kamai 39 ron na ki 149 tylli ki bol (4x4s), katba ha kawei pat ka liang u Ajay u la tied kham laitluid. U Ajay, uba ïalehkai ha ka samoi ïalehkai kaba ar jong u na ka bynta ka Meghalaya, u la kynjoh ïa ka spah ron jong u da kaba thlieh ïa ka six (6) hynrei u khlem shym la lah ban ïaineh haduh kaba kut jong kane ka sngi ha kaba u la shah pynhap noh na ka bynta 129 ron na ki 217 tylli ki bol (15x4s, 2x6s).
U la nohsynñiang 119 ron na ka bynta u wiket uba ar ha ka jingïatreilang bad u Bamanbha bad 111 ron na bynta saw wiket ryngkat bad u Swastic Chettri, uba la ïoh bun ka por ha ka tied khlem da shah pynhap ban pynkut ïa ka sngi na bynta 54 ron (97 bol, 7x4s, 1×6).
U nongtied ubym shym la lah ban kamai ron ha kane ka sngi udei u Rahul Dalal – u ba la mad ïa ka jingïalehkai kaba sniew mynta la ar sien lynter hadien ba u la mad ïa kajuh ka jingjia pyrshah ïa ka Sikkim ha ka jingïalehkai ba la dep.
Namar ba ka jingïalehkai hapdeng kine ki arliang ka sah sa tang shi sngi, lehse kam don shuh ka lad ban ïoh ïa ka resol jong ka jingjop ne jingrem, kaba mut ba u Swastic uba dang 23 snem ka rta, un ïoh ïa ka lad ban tied khlem jingeh katba u dang khmihlynti ban kamai ïa ka spah ron kaba sah jingkynmaw jong u hi ha ka samoi ba nyngkong jong u ha ka kynhun ba rangbah.
