Ranji Trophy 2025-26 hapdeng ka M’laya & Manipur: Tied ka Manipur 180 ron ha ka pali ba nyngkong; sahdien sa 250 ron

Shillong, Naiwieng 17: Ka Manipur ka la kamai 180 ron bad khyllem noh 4 wiket ha ka pali tied kaba nyngkong (1st Inning) kum ka jubab ïa ka thong kaba 430 ron jong ka Meghalaya ha ka sngi ba ar (Day 2) jong ka jingïalehkai jong ka Ranji Trophy 2025-26 plate group ha Surat hynne ka sngi Nyngkong.
Da kaba sdang biang na ka 359/5 hynne ka step, ka Meghalaya ka la bynrap sa 71 ron na ka bynta ki 5 tylli ki wiket ba khatduh. U Kush Agarwal (34 ron) bad u Swastic Chettri (18 ron) kidei kiba khatduh ban shah pynhap, katba u Aryan Borah, u la pynkut khlem da shah weng bad kamai 23 ron.
Ki don saw ngut ki nongkawang bol jong ka Manipur kiba la khur mar 2 wiket – kine ki kynthup ïa u Johnson Singh (2/34), u Ajay Singh (2/51), u Jotin Pheiroijam (2/58) bad u Bishworjit (2/77).
Ha ka jingïakhun ban beh ïa ka thong, ka Manipur ka la don hapdeng ka jingeh bad ka la duh noh saw wiket naka bynta 93 ron. Hynrei, ka jingïatreilang kaba skhem ban kamai 82 ron hapdeng u AL Bashid (52 not out) bad u Priyojit (49 not out) ka la pynthikna ba ka Manipur, ba kan lah ban pynkut ïa ka sngi khlem da shah weng biang ki nongtied.
Na ka bynta ka Meghalaya, ki saw tylli ki wiket ba ka la ïoh weng ha kane ka sngi kidei kiba la khur da u Akash Chaudhary (1/30), u Chengkam Sangma (1/31), u Aryan (1/34) bad u Swastic (1/47).