Ranji Trophy 2025-26: Da ka spah ron kamai u Rahul & Ajay ban buh ïa ka M’laya ha ka nongrim ba skhem

Shillong, Naiwieng 16: Baroh arngut ki nongïalehkai professional ba nabar (guest) jong ka Meghalaya, u Rahul Dalal bad u Ajay Duhan, ki la lah ban kamai ïa ka spah ron ha ka sngi ba nyngkong (Day-1) jong ka jingïalehkai plate group ha ka Ranji Trophy 2025-26 pyrshah ïa ka Manipur ha Surat hynne ka sngi.
U Rahul u la khyrwit 151 ron naki 146 bol ha ka Inning tied kaba kynthup ïa 23 tylli ki saw ron (fours) bad lai tylli ki hynriew ron (six), katba ka jingïaishah jong u Ajay ka la pynlong ïa u ban kynjoh 102 ron naki 184 bol ba kynthup ïa 13 tylli ki saw ron (four).
Ka Meghalaya ka la jop ïa ka jingkynting pisa (toss) bad ka la jied ban tied nyngkong, da kaba kamai 359 ron bad hap 5 wiket haki 90 ober.
U Arien Bonchang Sangma (31 ron naki 56 bol) bad u Arpit Bhatewara (33 ron naki 64 ron) ki la sdang nyngkong ha ka tied na ka bynta ka Meghalaya bad ki la ïatreilang ban noh synñiang 61 ron. U Arien u la shah pynhap nyngkong shuwa ban bud sa u Arpit hadien katto katne ober, bad u Kishan Lyngdoh (6 ron) u la shah weng khlem da ïohlad bha ban bynrap eiei kaba khraw ïa kynhun, kaba la pynduna ïa ka Meghalaya sha ka 74/3.
Nangta u Rahul bad u Ajay ki la pynsniew ïa ka sngi jong ka Manipur da ka jingïatreilang kaba neh slem ban kamai 247 ron na ka bynta u wiket uba saw haba ki la thlieh bad khyrwit naphang khlem jingmap ïa ki bol sha baroh ki dong jong ka madan CK Pithawala.
Baroh arngut ki la shah weng noh da u Johnson Singh (2/21 na ki 5 ober) shuwa ba ka M’laya kan shimti ïa ka pali bol pyrshah ïa u Swastic Chettri (14 not out) bad u Kusha Agarwal (18 not out).