Shillong, Risaw 18: Ka jingbym shai bha ka suiñbneng ka la pynthut ïa ka jingïalehkai ka lympung Ranji Trophy 2024-25 Elite jong ka Group A hapdeng ka Meghalaya bad ka Tripura, ha kaba la ïoh ban pyndep tang 7.2 over ha ka sngi ba nyngkong (Day 1) kaba la long ha MCA Ground, Polo ha ka sngi Thohdieng.
Ha tang kane ka por ba lyngkot, ka Meghalaya kaba la jied ban bol nyngkong hadien ba jop ïa ka jingkynting (toss) ka la ïoh ban pynhap ar ngut ki wiket ka liang pyrshah, ha kaba ka Tripura ka la lah ban tied 29 ron.
Shuwa ban sdang ka jingïalehkai, u President jong ka Meghalaya Cricket Association – u Nababrata Bhattacharjee u la pdiang sngewbha ïa ki player ka liang pyrshah kymjuh ruh ïa ki nongpynïaid ïa ka jingïakhun kiba la wanpoi ha Shillong, da kaba kdew kane ka jingïalehkai ka dei ka jingïakhun kaba nyngkong ha ka histori jong ka jylla ban ïoh pynlong ïa ka jingïalehkai kyrdan Elite bad kaba sngewtynnat ka jingïalehkai ka la long hapdeng ka Meghalaya bad kawei pat ka jylla jong ka thaiñ Shatei Lam Mihngi.
Kumba long ka dustur jong ka synjuk, u President ka MCA ryngkat bad u Honorary Secretary ka MCA – Bah Gideon Kharkongor bad u Dhrubajyoti Thakuria-Honorary Treasurer MCA, ki la pynkupburom ïa ki player ka liang pyrshah lem bad ïa ki nongpynïaid.
U Chengkam Sangma (1/11) u la khur ïa u wiket ba nyngkong ha ka over kaba ar jong kane ka sngi, da kaba pynkhyllem noh ïa u Bikram Kumar Das khlem da ailad ban kamai ron.
Hadien nangta u Akash Kumar Choudhary (1/18) u la shah tied haduh lai tylli ki Saw ron (Fours) ha u Tejasvi Jaiswal (13 ron) hynrei u la ïoh ban kput kylla ha kaba khadduh da kaba weng noh ïa u lyngba ka rai LBW.
Hadien sa ar tylli ki over, ka jingshai ka la sdang dum bad ka la pynsangeh noh ïa ka jingïalehkai. Baroh ar tylli ki kynhun ki kyrmen ban ïoh ïa ka jingïalehkai kaba pura mynta ka sngi.
