Shillong, Naiwieng 06: Ka long ka sngi kaba seisoh na bynta ki rangkawangbol hadien ba ka sngi ïakhun ba nyngkong jong ka Ranji Trophy 2024-25 Elite Group A hapdeng ka Meghalaya bad ka Jammu & Kashmir ha MCA Ground, Polo, la sakhi haduh 16 ngut ki wicket kiba la shah pynhap, katba ka kynhun ba ïakhun shabar nala ïing ka la ïoh ban lamkhmat da 52-ron.
Haba tied, ka J&K ka la lah ban kamai125 ron bad duh ïa 6 wiket hadien ba ka la pynkhyllem baroh ki nongtied ka Meghalaya da tang 73 ron.
Ka J&K ka la jop ïa ka toss bad jied ban bol nyngkong da kaba kyrmen ba kan pynkut kham kloi ïa ki nongtied ka Meghalaya.
Hynrei ki nongtied kiba nyngkong jong ka Meghalaya ki la lah ban shan tyngeh ha kaba u Bamanbha Shangpliang bad u Arpit Bhatewara ki la lah ban husiar bha, da kaba jai jai ban pynneh slem khlem shah pynhap wiket kumba shi kynta, da kaba khanglad ïa ki rangkawangbol pace bad spin jong ka liang pyrshah.
Kine ki shijur ki la lah ban bynrap lem 53 ron na bynta ka kynhun shuwa ba ka J&K kan pyndkut noh ïa ka jingïatreilang jong kine arngut, ha kaba u Bamanbha u la shah pynhap noh ha u rangkawangbol spin – u Abid Mushtaq hadien ba kamai 21 ron.
Ha ka over kaba bud, u Abid u la ïoh ban pynkhyllem noh sa ïa u Arpit (u ba la kamai 24 ron), bad naduh kane ka por ba ka Meghalaya ka la sdang ban mad jingeh ha ka tied bad ïoh kamai satang 20 ron shuwa ba baroh 10 ngut ki wiket kin shah pynkhyllem noh.
U Abid u la pyndep ïa ka inning bol ba nyngkong da 5 wiket bad shah tied tang 19 ron katba u Auqib Nabi u la khur 5/9.
Ka jingseisoh jong ki rangkawangbol ka la bteng ha kane ka sngi, ha kaba u rangkawangbol ba hakhmat eh jong ka Meghalaya – u Akash Kumar Choudhary u la ïoh ban khur 3 wiket, bad pynkut ïa ka sngi da 3/39 naki 15 over.
Watla kata ruh, ka kynhun ba ïakhun shabar nala ïing ka la ïohlad ban tam ïa ka thong kaba khyndiat ba la buh da ka Meghalaya haba kut jong ka session kaba ar.
Na ka liang jong ka Meghalaya ka la bteng ban ïakhun tyngeh, bad ka la ïoh biang ban pynhap sa lai wicket shuwa ba ka jingïalehkai jong ka sngi ba nyngkong kan kut.
U rangkawangbol Pace ka kynhun, u Ram Gurung u la khur 1/13 naki 4 over bad u Dippu Sangma u la ïoh ban khur 1/49 naki 11, katba u rangkawangbol spin – u Aryan Borah u la ïoh 1/20 naki 6obar.
Napdeng ki rangtied, u Abdul Samad u la long u ba kynsai tam na bynta ka J&K, u la lah ban kamai 34 naki 34 bol kiba u la bynrap da lai tylli ki six shuwa ban shah pynhap noh ha u Dippu.
Ka kynhun ïalehkai jong ka Jylla kan khmihlynti ban pynkhyllem kham kloi ïa ki wiket ba dangsah mynta ka sngi bad pynthikna ba ka inning ba nyngkong jong ka J&K kan nym long than eh kaba heh.
