Shillong, Risaw 19: Ka Tripura ka la lah ban tehlakam ïa ka jingïalehkai ha ka sngi ïakhun ba ar (Day 2) jong ka Ranji Trophy Elite na ka Group A pyrshah ïa ka Meghalaya kaba la long ha MCA Ground, Polo ha ka sngi Saitjaiñ.
Haba bteng biang ïa ka jingïalehkai na ka 29/2 hadien ba la ïoh ban tied tang 7.2 over ha ka sngi ïakhun ba nyngkong, kane ka kynhun kaba ïakhun shabar nala ïing ka la pynkyndit da kaba khyrwit haduh 346 ron bad hap 6 wicket naki 74.2 over shuwa ba ka jingkahdum kan pynthut biang ïa ka jingïakhun ha ka por mynsngi.
U Sridam Paul u la tyngshaiñ bha hadien ba u la khyrwit palat ïa ka spah ron, kata haduh 146 ron na bynta ka Tripura ha kane ka inning, kiba kynthup ïa 20 tylli ki four bad ar tylli ki six. Ka jingpyrshang jong u ban nang kyntiew ïa ka ron ka la pynlong ïa u ban shah pynkhyllem noh ha u Swarajeet Das (1/26 naki 5 over). Ka jingshah pynhap jong u Paul ka la wan lyngba ka jingïarap na u Aryan Borah uba ïohkem ïa ka bol khlem da ailad ba kan hap ha madan.
U Akash Kumar Choudhary (2/100 naki 25.2) u la ïoh ban pynkhyllem ïa u kapten jong ka Tripura – u Mandeep Singh u ba la kamai 59 ron, kane ka la jia hadien ba ka jingpyrshang jong u player ka liang pyrshah kam shym la poi sha jaka ba thmu hynrei la ïohkem noh ïa ka bol ha u Bamanbha Shangpliang.
U Mandeep bad u Sridam ki la lah ban kyntiew 132 ron shuwa ban shah pynhap u wiket ba saw, kaba long ka jingnoh synñiang kaba kordor bha na ka bynta ka kynhun jong ki.
Kiwei pat ki wiket ban shah pynkhyllem ha kane ka sngi la khur da u Dippu Sangma (1/76 in 19) bad u Aryan (1/29 in 4).
U MB Mura Singh u la ïoh ban tied ar tylli ki six na ki bol jong u Aryan bad ïaineh khlem shah pynhap da 53 ron. U paralok ba ïaineh ryngkat bad u dei u S Sharath, u ba la kamai 54 ron.
