Shillong, Risaw 28: Ka Meghalaya ka la ïoh ban tied157 ron bad duh noh 8 wiket ha ka inning tied kaba ar, leading by 72, kaba la biang ban pynlong ïa ka Maharashtra ban tied biang ha ka sngi ïakhun ba saw mynta ka sngi ha kane ka lympung Ranji Trophy Elite na ka Group A ha Aurangabad.
Ka Meghalaya ka la duh haduh 5 wiket ha ka por ba kynjoh 50 ron, hynrei ki rangtied ba bud ki la lah ban pynduna ïa ka jingshah pynkhyllem wiket, kaba la trei borbah da u MG Choudhary, rangkawangbol ka Maharashtra, u ba la khur ïa baroh lai ngut ki rangtied ba nyngkong ka Meghalaya da tang 21 ron ba ka la ïoh kamai.
U Anirudh B (ba kynjoh spah ron ha ka inning ba nyngkong) u la kamai 36 ron shuwa ban shah pynkhyllem noh. Katba u Akash Kumar Choudhary (u rangkawangbol ba seisoh jong ka Meghalaya), ha kane ka jingïalehkai u la kamai 26 ron na bynta ka kynhun.
Ryngkat ka jingkyrshan jong u Anirudh, kine ki shijur ki la lah ban kamai 73 ron shuwa ban duh ïa u wiket ba hynriew kaba la ïarap ïa ka Meghalaya ban tam ïa ka 85-ron jong ka inning ba nyngkong ba la lamkhmat da ka Maharashtra.
U Sumit Kumar u la pynkut ïa ka sngi ïakhun ba lai da 24 ron (not out) katba u Aryan Borah u khlem pat la ïoh ban kamai ron.
Shuwa ba ka jylla kan shimti ban tied, ka Maharashtra ka la bteng ïa ka inning ba nyngkong na 263/5 bad ka la kamai sa 98 ron shuwa ban shah pynkhyllem baroh ki wiket ban kynjoh 361 ron kum ka jubab ïa ka Meghalaya kaba la tied 276 ron ha ka inning ba nyngkong.
U Harshal Kate, u la tied 128 ron shuwa ban shah pynhap noh ha u Akash. U ne u dei u wiket ba tang marwei na bynta u Aakash ha kane ka sngi, ha kaba u la pynkut ïa ka inning da 4/76 naki 28 obar.
U MS Bhandari u la long ka jingwit kaba khraw ïa ka Meghalaya ha kaba u la kamai 73 shuwa ban shah pynhap noh ha u Dippu Sangma (1/74 naki 20 obar). Kiwei pat kiba khur wiket ki long u Ajay Duhan (2/34 naki 14.2) bad u Chengkam Sangma (1/86 naki 19).
