Shillong, Nailur 18: Ka komiti jied player ka kynhun ba la rangbah (senior men’s selection committee) jong ka Meghalaya Cricket Association ka la jied ïa 12 ngut ki player trai jylla ryngkat bad san ngut ki player shongben (standby) na bynta ki ar tylli ki jingïalehkai ba nyngkong jong ka lympung Ranji Trophy 2024-25.
Ka Meghalaya ka la ïoh ban rung sha ka thup ïakhun Elite Group mynta ka samoi hadien ba ka kynhun ka seisoh ha ka thup ïakhun na ka Plate Group ha ka samoi 2023-24, ha kaba ka jylla ka wan kyrdan ba ar (runners-up) hadien ba shah rem ha kaHyderabad ha ka final.
Ha kane ka Ranji Trophy 2024-25, ka Meghalaya kan aireng nyngkong ïa ka Service shabar nala ïing naduh 11 tarik haduh 14 tarik u Risaw shuwa ban wanphai hala ïing ban ïakhun pyrshah ïa ka Tripura ban sdang naduh 18 haduh 21 tarik u Risaw ha Shillong.
Ha kaba ïadei bad ki lai tylli ki jaka napdeng ki 15-ngut ki rangïalehkai ka kynhun, kaba long na bynta ki player ba nabar ym pat shym la pyndap ha ki nongjied.
Ki don tang katto katne ki jingpynkylla ïa ka thup kyrteng ki player na bynta kane ka samoi, ka jingjied ïa kaba la leh hadien ka jingpynkhreh ha ka por ba la jied shuwa 30 ngut ki nongïalehkai ha u bnai Naitung.
Arngut ki durkhmat ba thymmai ki kynthup ïa u Arpit Bhatewara, uba la ïalehkai barabor ha ki kyrdan ïalehkai na ki club ha Shillong bad u Roshan Warbah, u ba la shah kyntiew kyrdan na ka kynhun ïalehkai U-25. Ki rangïalehkai ba pawkhmat na ka jingïalehkai jong ka Ranji ha ka samoi ba la dep, kum u Kishan Lyngdoh, u Dippu Sangma bad u Akash Kumar Choudhary, ki la shah pynneh ha ka thup kyrteng ki player ka kynhun.
Ka kynhun kan ïoh ruh ïa u head coach ba thymmai, u Prabhakar Bairgond, u ba la long u nonghikai ïa ka kynhun ïalehkai U-23 ki kynthei ka Meghalaya mynshuwa ha u snem 2018-19, bad naduh katei ka por u la ïoh ïa ka kyrdan kum u coach.
Kine ki 12 ngut ki rangïalehkai trai jylla (Meghalaya) kiba la shah jied na bynta ki ar tylli ki jingïakhun ba nyngkong jong ka Ranji Trophy 2024-25 ki long u : Aryan Borah, Akash Kumar Choudhary, Arpit Bhatewara, Bamanbha Shangpliang, Bijon Dey, Chengkam Sangma, Dippu Sangma, Jaskirat Singh Sachdeva, Kishan Lyngdoh, Ram Gurung, Roshan Warbah bad u Swarajeet Das.
Ki san ngut ki player standby ki long u Adarsh Joshi, Anish Charak, Lerry G Sangma, Shembhalang Pyngrope bad u Yogesh Tiwari.
Ki nongkitkam jong ka kynhun ki long: Prabhakar Bairgond (head coach), Moisten Ch Marak (assistant coach), Surojit Biswas (physio), Vikash Singh Chauhan (trainer) and Dister Marbaniang (manager).
Kine ki player ryngkat bad ki support staff ba la kdew haneng kin bteng ïa ka jingpynkhreh jong ki ha Cuttack tad haduh ba kin da ïakhlad ban ïakhun ha katei ka lympung ha ka 8 tarik u Risaw.
