Shillong, Nohprah 17 : Ka Meghalaya Cricket Association ka la pynkhreh ban pdiang ïa ka jingïalehkai Ranji Trophy ha Shillong, ha kaba ka kynhun ïalehkai kriket jong ka jylla kan ïakhun pyrshha ïa ka Sikkim ha madan ïalehkai kriket jong ka MCA ha Polo naduh ka 20 tarik Nohprah 2022.
Ka sien ba khatduh ba la pynlong ka jingïalehkai Ranji Trophy hangne ha Shillong kadei ha u Nohprah 2018, kaba dei ruh ka samoi kaba nyngkong ba ka Meghalaya ka ïashim bynta ha katei ka lympung. Ka jingïalehkai ha la ïing na bynta ka Meghalaya ha u 2019-20 la hap ban pynïalehkai shabar ka jylla namar ka jingshna pynbha ïa ka madan ïalehkai, katba ha ka samoi 2020-21 la weng noh na ka daw ka jingpang Covid-19. Mynta pat katei ka jingïalehkai first class ka la wanphai biang ha ka samoi kaba bud hynrei ka BCCI ka la pynbeit ïa ka Meghalaya ban ïalehkai ha Gujarat.
Ha ka samoi 2022-23 yn sa sakhi biang ïa ka jingïalehkai Ranji Trophy ha Shillong kaba dei ruh ka sien ba nyngkong hadien ki saw snem.
Ha ka sngi Palei, u Abey Kuruvilla, uba dei u General Manager jong ka BCCI, u la wan ban jngoh ïa ka madan ïalehkai jong ka MCA ha ryngkat u Girish.
U Kuruvilla, uba dei u rangïalehkai barim ka ri India u la ai ka jingïaroh bad sngew hun ïa ka jingpynkhreh na bynta katei ka tournament kaba dei ruh ka jingïalehkai ba nyngkong napdeng ki lai sien ban pynlong ha Shillong. Utei u nongïalam u la pynlut por ruh ha ryngkat ki nongkitkam ka MCA ban ïakren phylliew jingmut hapoh ka jingïalam u Naba Bhattacharjee uba dei u President ka MCA.
Ka Meghalaya ka la jop ïa ka jingïalehkai sdang pyrshah ïa ka Mizoram ha ka jingïalehkai ha Nadiad, Gujarat, ha ka sngi Thohdieng ka la wanphai da kaba khur jingjop ïa ka inning kaba nyngkong hadien ba ka la beh ïa ka thong ba 298 ron bad sah sa ar wicket.
Kadei ka jingtrei shitom jong ka kynhun bad ka donkam ban pynneh ïa kane ka rukom ïalehkai ha kaba kan sa ïakhun pyrshah ïa ka Sikkim ha la ïing. Katei ka kabu ban ïoh ïalehkai ha la 1ïing kan long kaba itynnad bha ha kaba ka Sikkim ruh kan ïakhun tyngeh hadien ba ka la pynliem ïa ka Manipur da phra wicket ha ka jingïakhun kaba nyngkong.
Ka MCA ka pyntip ruh ba ka khot sngewbha ïa ki paidbah ban wan peit kai khlem da donkam siew bai rung.
