Khliehriat Naiwieng 14: Ki bor pynïaid jong ki skul lem bad ki nonghikai skul ha East Jaiñtia Hills District, mynta ka sngi ki la pynlong ïa ki prokram kiba itynnad bad ba phuh ba phieng ha la ki jong ki jong ki skul ryngkat lang bad ki khynnah bad kane ka dei ka sngi ba la rakhe ha baroh kawei ka ri India kum ka sngi kyrpang jong ki khynnah.
Kumba baroh la ïa tip ba mynta ka sngi ka dei ka sngi ba kyrpang jong baroh ki khynnah, namar kane ka dei ka sngi kha jong u Pandit Jawaharlal Nehru, uwei na ki riew khraw ka ri India, uba don ka jingieid kyrpang ïa ki khynnah, uba don ruh kata ka jingïohi jngai bad ngeit ba ki khynnah ki dei ka lawei, ki nongsaiñdur ïa ka ri ha ka lawei.
Na ka liang u Principal jong ka Khliehriat Higher Secondary School, u Brother Solomon Swer, ka Principal jong ka Tluh Higher secondary School, ka Sr. Selina Mawlong, RNDM, Principal jong ka Star Public School, Lumshnong, u Dillip Kumar, ka Principal jong ka Khatsoo Ripnar Brightstar Secondary School, ka kong Thailinda Nongtdu bad kiwei kiwei ki la ai khublei kyrpang ïa ki khynnah skul ha kum kane ka sngi ba kyrpang jong ki khynnah ba ju tip ruh kum ka Children’s Day.
Ha ki skul bapher bapher kiba don hapoh East Jaiñtia Hills District, ki bor pynïaid skul ki la pynlong ïa ka prokram ha ki skul ban pynkmen bad pynsngewbha ïa ki khynnah da ki jingpynbyrngia bapher bapher, kum ki jingrwai, jingshad bad kiwei kiwei ki jait jingpynbyrngia ban pynsngewbha ïa ki khynnah, ha kajuh ka por ki la ai ruh ïa ki kyntien sneng kyntu ïa ki khynnah ba ki dei ban long kiba don akor, don burom, ban long kiba minot ha ki jingpule bad long ruh ki khlur ki ban saiñdur ïa ka lawei ba phyrnai, kumba u Jawaharlal Nehruh u ïohi bad u angnud ïa ka lawei ba phyrnai ha ki khynnah.
