Khliehriat, K’Lyngkot 03: Ka Seng Samla Khlachympa Sports and Cultural Club ha ryngkat ki nongshong-shnong jong ka Nongtalang Khlachympa Locality hi baroh kawei ha ka rukom ba iphuh iphieng myn ha ka 1 tarik mynta u bnai kyllalyngkot 2025 ki la pdiang burom ïa u snem thymmai da kaba pynlong ïa ka jingiakynduh lang bad la pyniphuh iphieng ïa kane ka sngi da ki prokram bapher bapher bad ki jingiakop bapher bapher.
Ha katei ka sngi ka la don ka jingiakop shad, iakop rwai bad ka jingai sngewbha ïa ki ar ngut ki nongtrei mon sngewbha bad la don ruh ka jingiakop thei bhabriew ne ka Miss Nongtalang Khlachympa 2026, ha kane ka jingiakop ïa ka paiñsngiat Miss Nongtalang Khlachympa 2026 la ioh phong da ka Edamerable Lyngdohgiri, ïa ka 1st. runner-up la ioh ban phong da ka Miss Fidalia Lyngdoh talang bad ïa ka 2nd. runner-up la ioh ban phong da ka Miss Emidakajuh Pohsnem.
Ha kane ka jinglehkmen pdiang ïa u snem thymmai la wan ban pynshngain¨ lang da u bah Lahkmen Rymbui uba dei Local MLA ka thaiñ uba dei ruh u myntri ka sorkar jylla bad uba dei ruh u nongshong-shnong ba pura ka Nongtalang Khlachympa Locality, la ïa don lang ruh u bah Jamshaphrang Pohtam uba dei u MDC ka thaiñ jong ka War-Central Constituency, u Dr. Return Pohsnem Deputy Director Health Services (ADMIN) Directorate of Health Services (MI), u Dr. Duniya Pohsnem i/c Nongtalang CHC, u Dr. Overfillme Suliang Nongtalang CHC bad kiwei kiwei de ki riew pawkhmat kiba na ka dong Nongtalang Khlachympa.
Haba kren ha ka jingialang na ka liang ki nongpyniaid jong ka Club ki kyrmen ba une u snem thymmai un long u snem ka jingkyrkhu ïa baroh lang ha baroh ki liang bad ki la ai khublei snem thymmai Basuk Bakmen ïa baroh lang.
