Jowai, Jylliew 07: Ka Meghalaya Bharat Scouts & Guides, West Jaiñtia Hills District hynnin ka sngi kala rakhe ïa ka sngi pynneh pynsah mariang ne ka ‘World Environment Day’, da kaba pynlong ïa ka jingthung tynrai dieng ha phyllaw jong ka ophis treikam kaba don ha Iawmusiang, Jowai.
Hashwa kane la don ka jingïalang ba la pynïaid da u Adiam U Bthuh, Jt. District Secretary MBS&G, la ïoh ruh ki kyntien pdiang na ka kong Siami Shylla, District Organiser (G), WJHD, katba u Julius Lyngdoh, District Training Commissioner Scouts, WJHD bad ka kong S. Tariang, District Commissioner (G), WJHD kila batai bnai shaphang kane ka sngi kyrpang.
U Julius Lyngdoh, ula pynsngew ba la sdang ïa kane ka sngi kynmaw burom ïa ka sngi pynneh pynsah mariang naduh ka snem 1072 bad ka dei ruh ka snem ba ka United Nation kala sdang leh burom ïa ka World Environment Day kaba ong “Only One Earth” bad mynta kala kynjoh sha ka 50 snem.
Ka kong S. Tariang kala kyntu ïa ki para dkhot ba kin don ka jingkitkhlieh na ka bynta ka mei mariang, namar ha kine ki sngi ba mynta ka jingpynjot pynpra ka mei mariang ha kylleng sawdong sawkun da u khun bynriew kala jur bha.
La pynsngew ruh ba ka Scouts & Guides Movement ka dei kawei na ki kynhuh kaba ïakhun ban ïada ïa ka mariang ban pynneh pynsah na ka jingpom pathar ïa ki dieng bad khanglad na ka jingpyndonkam pla plastic bad kiwei de.
