Nongstoiñ, Ïaiong 4: Ka Khasi Students’ Union Sengkmie ka la rakhe pyneh rngiew ïa ka sngi kyrsiew ri (Khasi National Awakening Day) mynta u snem, da kaba pynlong jingïalang paidbah ha ka shnong Nongkhlaw ha syndah ka krem ba pawnam ba U Syiem Tirotsing Syiemlieh u la pynlong kum ka len shipai ha ka mynnor ha ka por ba dang jur ka thma pyrshah ïa ki dohlieh kiba la thombor ïa ki khun ki hajar ka Hima Khatsawphra.
Ka jingthmu jong kane ka jingïalang ka long na ka bynta ban kyrsiew thiah bad pynim pat ïa ka mynsiem ïaleh ba satar jong ki longshwa ba ka Jaitbynriew ka la sei, kata naduh U Tirotsing, Kiang Nongbah, Wickliffe Syiem, Ka Phan Nonglait, bad kiwei pat ki rang bad ki thei kynsai jong ka Ri Khasi.
La ïoh jingkren nyngkong na u Samla Rangkynsai Ryntathiang, Johnfisher Nongsiang ba dei U President KSU WKHD Unit, Bah Klemen Dkhar Sordar Shnong Nongkhlaw, Samla Donald V Thabah General Secretary KSU CEC bad I samla Lambokstarwell Marngar President KSU CEC.
