Shillong, Nailar 07 : Kum shi bynta ban rakhe ïa ka National Weavers Day, kaba hap ha ka 07 tarik mynta u bnai, ka kynhun jong ki nongïalam BJP kynthup ïa u dkhot ka NEC u Bah David Kharsati, ka President ka Mahila Morcha ka jylla ka Kong Suki Pariat bad ka Vice President ka Mahila Morcha ka Kong Ïaishah Rymbai ki la hïar sha ka jaka thain jain kaba don ha Kdonghulu Bhoirymbong Block, ha Ri Bhoi district ban rakhe ïa kane ka sngi kyrpang.
Ïa kane ka prokram la pynlong da ka jingïatreilang bad ka seng treilang jong ki nongthain jain kti ka Raid Ïapngar. Ha kane ka sngi la donlang ruh ka Kong Benita Muktieh kaba dei ka Assistant Industries Officer ka DCIC.
Ha kane ka prokram, ki nongïalam BJP ka jylla ki la pyntip shaphang ki skhim bapher bapher kiba la shna na ka bynta ki nongthaiñ jain lyngba ka sorkar pdeng hapoh ka jingïalam jong u Myntri Rangbahduh ka Ri u Narendra Modi.
Ki la kren ruh shaphang ka jingmyntoi jong kum kine ki skhim. La ai jingtip ruh ïa ki nongthain jain shaphang ka juk thymmai bad ki tïar pynïaid iew kiba lah ban ïoh da kaba suk da ki nongthain jain mynta, da ka jingai sngewbha da ka BJP ba la ïalam da ka sorkar pdeng.
Ki nongïalam ka BJP ki la ai khublei ïa ki lai ngut ki nongthaiñ jaiñ kiba la kham rangbah, kata ba kynthup ïa i Mei-ieid Beronika Sujai iba la dap 90 snem ka rta, Kong Regina Sujai kaba dang 65 snem ka rta bad Kong Prissila Rymbai ba dang 62 snem ka rta. Ka kynhun ka la ai jingkyrshan ruh ïa ki nongthain jain da kaba thied bun ïa ki mar jong ki.
Ïa kum kine ki prokram la pynlong ruh ha Tura ha kane kajuh ka sngi. Haba kren ha kane ka jingïalang, ka President jong ki Longkmie BJP, Kong Susuki Pariat ka la ong, “To ngin pynkup bor ïa ki nongthaiñ jaiñ da kaba pyndonkam shuh shuh ïa ki mar tynrai, khnang ba ki nongthaiñ jaiñ kin roi bad ka kam shna jaiñ jong ki kan ïai kiew shaphrang.”
