Nongstoiñ, Nailur 5: Ïa ka 61th Teacher’s Day la rakhe ha West Khasi Hills District ha Vanni’s Hall Pyndengrei Nongstoiñ, da ka tnad Education West Khasi Hills Nongstoiñ, haba la donlang ruh da u Bah M.Byrsat Chairman Meghalaya State Law Commission kum u kongsan lem bad u bah H.K. Thabah ADC kum u symbud kongsan. Kiwei pat ki long Rev Fr M.Thongni Parish Priest St.Peter Pyndengrei, Principal of JNV, ki District Heads, ki nonghikai bad ki khynnah skul ka sor Nongstoiñ.
Haba kren ha ka jingïalang, u kongsan u la pynkynmaw ba ïa ka Teacher’s Day la rakhe khnang ha ka 5 tarik u Nailur man u la snem, namar ka dei ka sngi kha jong u (L) Dr S. Radhakrishnan, u ba long u riew stad bad u nonghikai ba khraw u ba la aiti ïalade ban kyntiew ïa ka pule puthi ha ka ri hi baroh kawei.
U la ong ruh ba ka kam hikai ka dei ka kam kaba khraw bad kaba don burom tam, namar u lane kaba hikai, ki shim ïa ka jingkitkhlieh ban kyntiew bad pyyphyrnai ïa ka lawei jong ki khynnah skul kiba long ka lawei ïa ka ri. U la kyntu bad khot sha baroh ki nonghikai, ba kin ai ïa kaba bha tam ha ka jingshakri jong ki ban kyntiew ïa ka jingnang jingstad. Kumjuh ruh u la kyntu ïa ki khynnah skul ba kin long kiba kohnguh ïa la ki nonghikai bad ba ki dei ban long ki samla pule ki ban tyngshaiñ na ka bynta ka ri bad ïa ka imlang sahlang.
Katba na ka liang u Bah H.K.Thabah ADC, u la ïaroh bad ai khublei kyrpang ïa ka jinglah jong ki nonghikai, namar khlem ma ki ka dong ka thaiñ, ka jylla bad ka imlang sahlang kam long satia kumne kumba ka long mynta. U la ong ka jinglah jong ki ban shakri bad ïai tbeh ïa ka sharak jingshai, ka la long ka jingkyrkhu kaba khraw tam ba ka imlang sahlang ka ïoh ban mad.
Kiwei pat ki prokram ha kane k sngi ki long ka jingsam ïa ka District Level Award Distribution sha u Bah B.Victor Myrthong Assistant Teacher ka Anderson Higher Secondary School Nongstoiñ bad Bah H.Roy Lyngkhoi Head Teacher Church of God L.P school Mawsaw. Kumjuh ka khusnam ba kyrpang sha u master of Scout Damien Nongsiang ka Nongstoiñ Public Secondary School bad Captain of the Guide I Ribanylla Lyngdoh na ka Presbyterian School Mairang.
La pynsngew ruh ïa ki jingrwai ba kyrpang na ka Assembly of God Secondary School Siejlieh, ka jingkren lyngkot na kiba ïoh khusnam bad kiwei kiwei de ki prokram kyrpang. Ïa ka jingïalang la pynïaid da I kong L.Syiemlieh DSEO, bad la kren pdiang burom pat da I kong R.Kongwang Joint Director DSEL W.K.H.
