Rakhe ki paid Khristan ïa ka Good Friday, kiew lum Kalbari ka Parish Mairang
Ka pop ka la hap ha U Jisu namar ki pop jong ngi: Rev Cunville
Shillong, ïaiong 15: Ka Balang Khristan ha shi tyllup ka pyrthei ka la rakhe ïa ka sngi Good Friday mynta ka sngi lyngba ki jingshakri bapher bapher. Kane kadei ka sngi ba ki Khristan ki ngeit ba kadei ka sngi ha kaba U Jisu Khrist U la shah ïap ha ka Diengphna halor lum Kalbari, kumba arhajar snem tam mynshuwa.
Ka histori ka ïathuh ba kane ka rukom pynïap kadei ka jingïap kaba shyrkhei bad kaba kordit tam kaba ym ju jia mynno mynno ruh.
Ha jylla Meghalaya ruh ki paid Khristan ki la rakhe ïa kane ka sngi da ka jingkmen ban kynmaw ïa ka jingshah ïap U Nongpynim jong ki namar ki pop jong ki.
U Rev. Dr. RR Cunville, uwei na ki Nongïalap ba khraw ka Balang Presbyterian ha kylleng kylleng ka pyrthei, haba ai ïa ka khubor Good Friday lyngba ka Good News TV jong ka Jingïaseng samla KJP Synod Sepngi, u la pynkynmaw ïa ka jingshah shitom U Khrist halor ka diengphna,namar ki pop jong kiba ngeit. “ Ka pop ka la hap kynsan kynsan ha U Jisu namar ki pop jong nga bad jong phi”, la ong u Pastor Cunville.
U la pynkynmaw ruh ïa ka jingshah shitom U Trai ha ki shipai, ha kaba la pynmong ïa k amet jong U da ki shabuk kiba nep. Ka jingsah da ki prek na ki kti bad ki kjat. Ka pangsngiat shiah kaba la dung na ka khieh jong U. “Katno U Trai U la shah jynjar, U la shah kordit, ym namar ki jingle jong u, hynrei namar ki jingleh jong ngi ki briew.
Hynrei u Pastor u la pynkynmaw pat ïa u dakaid halor ka diengphna, uba la shah nar phna lang bad U Trai, kumno ba u la ïoh map ei haba u la pan map ïa la ki pop jong u.
Ha kajuh ka por ka jingrakhe ba la pynlong da ka Catholic St. Thomas Parish Mairang, lyngba ka Sub District Pyndengumïong, da kaba pynlong ka jingïaid riewblei ka lynti ka diengphna da ki paid riewngeit, kaba la sdang na phyllaw jong ka Parish shaduh u lum Kalbari ka Parish Mairang. Ha kane ka jingïaid riewblei ka lynti ka diengphna, la ïashim bynta da ki dkhot ka Balang naduh ki khynnah, ki samla haduh kiba la san.
Kumjuh ruh kiwei kiwei ki Balang ki la rakhe kyrpang ïa kane ka sngi kaba khuid ha kylleng kylleng ki jaka jong ka jylla.