Khliehriat, Jymmang, 13: Ka Trained Nurse Association of India (TNAI), East Jaiñtia Hills District Unit, hynnin ka sngi ka la rakhe ïa ka International Nurses Day kaba dei ruh ka sngi kha jong ka Florence Nightingale da kaba pynlong ïa ka prokram bad kyrpang jong ki Nurse ha PHC Pamrapaithlu, East Jaiñtia Hills District ha kaba u myntri ka sorkar jylla uba dei ruh u MLA jong ka Khliehriat u bah Kyrmen Shylla u la long kum u kongsan.
Haba kren kum u kongsan, u bah Kyrmen Shylla u la ai ka jingiaroh bad jingkhublei sngewnguh ïa baroh ki nurse, u la ong ba ki nurse ki long kum u budlum jong ka koit ka khiah hapoh ka District bad hapoh ka Jylla, kiba trei shitom met bad mynsiem, kiba ai ïa ka jingshakri kaba pakka ha kaba ai jingsumar sukher ïa kiba pang ba shitom kiba donkam ka jingiarap, u la ai ruh ka jing kitbok kitrwiang bad ai mynsiem ruh ïa baroh ki nurse ba wat hapdeng shibun ki jingeh, jingtynjuh ba ki iakynduh ha ki kam jingshakri ba kin nang ïai bteng ïa kane ka jingshakri jong ki sha kiba pang ba shitom.
Ha shwa ban sdang ka prokram la ïoh ïa ki kyntien pdiang burom na u bah Mihsalan Dkhar, u ba bat kum u Secretary TNAI, EJHD unit, kumjuh ruh ïa ki kyntien nguh blei na ka Sr.Wianda Talang, ANM Tuber Sub-Centre, pynbud pat sa ka jinrwai ïa ka sur Anthem ba la rwai da ki nurse nangta pat ka jingthang mommati ha ka por ba shim ïa ki kyntien kular ne ka Pledge
Ïa ka phang jong kane ka jingrakhe ha une u snem 2025 la pynshai bad kren lyngkot da ka Kong Jenny Mary Dkhar, kaba dei ka President TNAI, EJHD Unit.
Ha kane ka prokram, ka TNAI, EJHD Unit ka la pynkup burom ïa ka Kong Kerlang Sutnga, ANM Dkhiah Sub- centre bad ïa ka Kong Shaimon Mukhim, LHV ka Lumshnong PHC ki ban sa shongthait noh na ka kam shkri jong ki kum ki Nurse.
Ha kane ka sngi kyrpang jong ki Nurse kiba la ai jingkren ki kynthup ruh u Dy. CEM ka Jaiñtia Hills Autonomous District Council (JHADC) Bah Lasky Rymbai kum u symbud kongsan, u District Medical & Health Officer, u Dr. D Shylla, u M/O Incharge Pamrapaithlu PHC, Dr.R Suchiang, Waheh Shnong Pamrapaithlu Bah Lening Star Rymbai, Kong Daroiki Dkhar kaba dei ka Staff Nurse Pamrapaithlu PHC bad kiwei kiwei.
Kiba la ïa don ryngkat lang ki kynthup u Dr.G Chyrmang lem bad ki doctor jong ka PHC Pamrapaithlu, ki nongkitkam jong ka TNAI, EJH unit bad kiwei kiwei.
