Rakhe ki nongtrei karkhana dewbilat ïa ka North East Metalliferous Mine Safety Week

Khliehriat, Naiwieng 21: Ha ka jingrakhe ïa ka taïew 22nd North East Metalliferous Mine Safety Week- 2025, kaba don ka jingthmu na ka bynta ka jingshngaiñ ki nongtrei kiba trei ha ki par mawshun jong ki company dewbilat, ka North East Metalliferous Mines, kaba hapoh ka jingpeit jong ka Directorate General of Mines Safety, Guwahati Region, ha ka 20 tarik mynta u bnai ka la pynlong ïa ka prokram ba kyrpang kaba long ruh kum ka jingïakop, ka Trade Test Competition ha kaba la ïashim bynta da ki nongtrei jong ki karkhana dewbilat bapher bapher kiba don ha East Jaiñtia Hills District, ïa kane ka prokram la pynlong ha ki ar tylli ki jaka ha East Jaiñtia Hills District, ha Dalmia Cement (Bharat) Limited bad ha Meghalaya Cements Limited.
Ha katei ka Trade Test Competition, ki la don 150 ngut ki nongtrei bad ki Supervisor kiba trei ha ki par mawshun kiba na ki 17 tylli ki par mawshun lane ki opencast mines bad kine ki dei ruh kiba ïa don bynta ha ki jingïakop Trade Tests kiba na ki 11 tylli ki Trade, san tylli ki 5 Trades Test Competition la pynlong ha Dalmia Cement (Bharat) Limited bad hynriew tylli ki Trades Test Competitions la pynlong ha Meghalaya Cements Limited East Jaiñtia Hills District.
U Deputy Director of Mines Safety, u Banothu Venkanna u la long kum u kongsan bad u Deputy Director of Mines Safety, Guwahati Region, u Abhimanyu Singh Ogra kum u symbud kongsan ha kitei ki prokram jingïakop Trade Test Competition bad kiba la ïa don ryngkat lang ki kynthup u HOD Mines-Dalmia Cement (Bharat) Limited, Meghalaya; u Hemant Sharma , u DGM-Mines, Star Cement Limited; u Rajesh Goyal, u Senior Manager Mines, Meghalaya Cement Limited, u K. C. Sahu.
Ha kitei ki prokram jingïakop Trade Test Competition ki la don haduh 114 ngut kiba la jop ha kaba la sam ïa ki khusnam bad ki prize.