Rakhe ki nongrep ka East Jaiñtia Hills ïa ka Women Farmers’ Day- Mahila Kisan Diwas

Khliehriat, Risaw, 15: Ka tnat ne ka Agency jong ka rep ka riang, ka Agricultural Technology Management Agency (ATMA), East Jaiñtia Hills, mynta ka sngi ka la pynlong ïa ka prokram ba kyrpang tang kito ki kynthei kiba dei ki nongrep, ka Women Farmer’s Day lane kaba ju tip ruh kum ka Mahila Kisan Diwas, ha Hall jong ka ophis Agriculture ha Khliehriat.
Lah ban ong ba kane ka jingrakhe ka pyni shynna ïa kata ka jinglah ki kynthei ban noh syniang ha ka rep ka riang namar ka rep ka dei kawei na ki kam ba kongsan tam kaba long u budlum ha ka ri baroh kawei.
U Deputy Project Director jong ka Agricultural Technology Management Agency, u bah G.Kharshandi haba kren ha ka jingialang u la ong ba katno ka long kaba sngew sarong ba ki kynthei ha kane ka jylla Meghalaya ki ïoh ïa ka jingpynkup bor ym tang ha ka ai jait sha ka kynthei hynrei la pynkup bor ruh ïa ki ha ki kam bapher bapher kumjuh ruh ha ka rep ka riang, ym lah ban len ba ki rangbah ne ki shynrang ruh ki don ka bynta ba khraw ha ka rep ka riang bad donkam ba kin kyrshan lem ïa ki kynthei ha ka kam rep bad ki donkam ban don ka jingmut ba skhem ban ai ka jingiatreilang bad ki kynthei ban kyntiew shuh shuh ïa ka rep ka riang.
“Kane ka jingrakhe ïa kane ka sngi Mahila Kisan Diwas lane ka Women’s Farmer Day ka pynpaw ruh ïa kata ka jinglong ba ha khmat eh ki kynthei ha ka rep ka riang kiba don ka mynsiem ruh ban trei bad kyntiew ïa ka kam rep, ka pyn phalang ruh ïa ka jinglah ki kynthei nongrep ban ieng ban iaid shakhmat wat hapdeng bun ki jingeh bad jingialeh ha ka jingim” ong u bah Kharshandi.
Na ka liang ka ATMA ka buh ruh ïa ki kyntien phira ba dei kynmaw ba kane ka jingpynkup bor ïa ki nongrep kynthei ka donkam eh ba ki dei ban ïoh ruh ïa ka jingnang jingstad kaba katjuh bad ki shynrang, ka jingshah hikai ne training bad ki donkam ruh ban ïoh ïa ki jingaimynsiem bad jingpynshlur ba ki dei ban tip ruh ban pyndonkam ïa ki kor ki bor jong ka juk technology, ki dei ruh ban ban ïoh ka jingkyrshan lem na ka tnat ka rep ka riang ha ka liang ka bor met bad jingkyrshan kaba da ka pisa na ka bynta ban kyntiew ïa ka rep ka riang.
U bah G.Kharshandi u kyntu ïa ki nongrep baroh ba ki dei ban tip ïa kane ka tnat treikam ka Agricultural Technology Management Agency(ATMA) khnang ban dup lah ban kyntiew shuh shuh ïa ki nongrep bad ban don ruh ka jingiadei ba jan bad ka Agency ha ki kam kiba iadei bad ka rep ka riang.
Ha kane ka prokram, kiba la ai jingkren ki kynthup ruh ka Project Director ATMA, ka kong L.Lakiang, u District Horticulture Officer East Jaiñtia Hills District, u bah Deibormi Dhar, ka kong Kopris Rymbai, ka nongrep kaba ïoh khusnam kaba na shnong Wapungskur bad kiwei kiwei, ha kane ka prokram la sam ruh ïa ki khusnam sha kito ki nongrep kiba shim khia bad kiba la kiew bha ha ka rep ka riang hapoh ka district, la sam ruh ïa ki tiar rep sha ki nongrep.